Pilersuisoq narraarartoq
Uumasut Ikinngutaasa paasisinnaanngilaat Qaanaami qimmit perlilersut nerukkaatissinneqarnissaannik ikiuiniarnertik, sooq Pilersuisumit narrutsaatigineqarnersoq
- Imminut aperinngitsoorsinnaanngilanga qanoq isillutik Frederik Olsen aamma Pilersuisoq qimminik perlerlutik toqorartunik isiginnaaginnarsinnaanersut, nalunagu quersuarmi nerisassanik uninngaannartunik peqarlutik? Oqaannarusuppunga, kikkut tamarmik ikiuussinnaasunut maannakkut pisumut ikiuunnissaat kaammattuutigissagakku. Nerukkaatissat 1,9 tons nassiussassagut ukioq manna ukiorloqqissappat naammannavianngillat. Neriuppunga - Namminersorlutik Oqartussat? - Avannaanut aningaasanik atugassiissasut Pilersuisumit nerukkaatissaat pisiarineqarlutik nerineqarsinnaaniassammata, Susanne A. Markdal, Uumasut Ikinngutaanit tupigusulluni oqaaseqarpoq.
Oqaaseqarneranut tunngaviuvoq, ullumi Pilersuisumi pisinniarfiit pisortaaneranit oqaaseqaateqarpoq, sooq Uumasut Ikinngutaat Danmarkimi qimmit nerukkaatissaanik pisinersoq, uffa Qaanaami Pilersuisoq qimminut nerukkaatissaq 26,6 tons uninngasuutigigaa - soorlu neqerooruteqarsimannginnersut! Uumasut Ikinngutaat isumaqarput ernummatissaqaratik.
- Ippassarli Uumasut Ikinngutaasa ikiuiniarnerat nutaarsiassaniippoq. Frederik Olsenip uagut attavigisimassagaluarpaatigut - neqerooruteqarfigalutalu! Uagut ikiuunniarnerput pillugu Pilersuisoq sanioqqunneqarsimasutut pissusilersorusukkuni, imminiik. Ullumi ajunngilanga ilerasuutissakka ikinnerupput - nalunnginnakku qimmit nerukkaatissaat apuutingajalersut, Susanne A. Markdal oqarpoq.