Orpik zebratut allalimmik qullitalik
Pisarneq naapertorlugu Narsami illoqarfiup orpia adventit sapaataasa siullersaanni nal. 16 ikinneqarpoq
Illoqarfiup orpia illoqartittut ikinngummit Gladsaxemit tunissutaasoq ukioq manna kusanarnerumaarpoq, amerlasuulli pingaartumik innuttaasut utoqqartaasa akueriuminaatsippaat sooq zebratut allalinnik qulleqassanersoq.
Orpik ikinneqareermat Kommune Kujallermi kommunalbestyrelsimut ilaasortaq Kalistat Lund oqaaseqatsiarpoq, Gladsaxe qutsavigalugu ukioq manna illoqarfiup orpianik aammaarluni tunissuteqarsimammat, neriullunilu inuit pingaartumik meeqqat orpimmik paarsilluassasut. Tamatuma kingorna innuttaasut juullip qaammataanik eqqissinartumik nuannersumillu misigisaqarnissaannik kissaallugit.
Taava kommunip traktoria kalitaqarluni takkuppoq qatserisartut biiliinik marlunnik qulliminnik ikumatitsisunik ingiallorneqarluni, juullip inui pingasut nissiaqqanik ikiorteqarlutik meeqqanut mamarkujuttunik agguaapput - meeqqat pisup siornatigut mamakujuttunut pisinnaanerminnut allagartanik tunineqarsimapput.
Silami pisut naammassimmata katersortarfimmi kaffisoqatigiittoqarpoq erinarsornertalimmik.