Qaanaami qimmit perlerput
Aleqa Hammondip Avanersuarmi immikkut aaffattassiissoqarnissaa kissaatigaa - piniartut qimmii nerukkaatissaqarniassammata
Inatsisartunut ilaasortaq aamma Siumup siulittaasua Aleqa Hammond, maanna naalakkersuisunut apeqquteqarpoq avanersuarmi aaveqassutsimut qanga kingullermik kisitsisoqarsimanersoq.
Tassunga tunngatillugu Aleqa Hammondip paaserusuppaa, aaveqassutsimut qanoq annertutigisumik sunniuteqassanersoq, avanersuarmi piniartut qimmiminnut nerukkaatissaqarumallutik immikkut aaffattassinneqaraluarpata.
Tassunga tunuliaqutaavoq aarrit neqaat qimminut nerukkaatitut pitsassuummat maannakkullu qimmit Avanersuarmi nerisassaqanngimmata.
Aleqa Hammond naalakkersuisunut allappoq, avanersuarmiut neqissaqarniarnermikkut inuussutissarsiornermikkullu qimmitik pinngitsoorsinnaanngikkaat.
- Qimmeqanngikkunik piniarsinnaanngillat, Siumut siulittaasua naqissusiivoq.
- Isumaqarpunga piujuartitsinissaq eqqartorneqartillugu piniartut piujuarnissaat aamma eqqarsaatigineqartariaqartoq, Aleqa Hammond tikkuaavoq ilanngullugu oqaatigalugu; Piujuartitsineq pineqartillugu inuit aamma inuuginnarsinnaanissaat aammalu imminut pilersorsinnaanissaat ilanngullugu pingaartutut nalilersuutigineqarluinnartariaqartoq.
Illit nalunngisaqarpit? Taamaappat redaktion@sermitsiaq.ag saaffigiuk!