Sermersuaqarnera 1912-mi naavoq
Issittumi immap sikua aakkiartortuarsinnarpoq
Ukiaq manna Issittoq qaammataasakkut assilineqarpoq, tassanilu takuneqarsinnaavoq Qalasersuarmi aatsaat taama sikukitsigisoq. Taama ilisimatuussutsikkut atuagassiaq Nature allappoq.
Alaatsinaanneq Norsk Polarinstitutimi ilisimatuunit suliarneqarpoq Canadami USA-milu ingerlatsiviit suleqatigalugit, JP.dk allappoq.
Ilisimatuut immap sikua ukiuni 1.450-ini kingullerni pisunut assersuuppaat, tassanilu misissuinerit takutippaat, immap sikua aatsaat taama annikitsigisoq.
Misissuinermi aamma paasineqarpoq immap sikua 1912-mi annertunerpaasimasoq, taannalu aamma annikitsumik sermersuaqarfiusimasup naaffianik taaneqartarpoq.