Kangilinnguimmi
Doris Jakobsen forsvarsministeri Nick Hækkerup nutaamik apeqquteqarfigaa. Tamatumuuna paaserusuppaa Kangilinnguit (Grønnedal) qanoq pineqassanersoq
Naak Siumut aamma Socialdemokratit Folketingimi suleqatigiikkaluartut Doris Jakobsen socialdemokratit illersornissamut ministeriannut Nick Hækkerupimut isornarinnittumik nipilinnik apeqquteqanngitsoorsinnaanngilaq.
Issatsiaq Siriusimut aningaasartuutit qanoq amerlatiginersut apeqqutigaa.
Maannakkut apeqqutigaa Kangilinnguit qanoq pineqassanersut Issittumi Sakkutooqarfik 2012 Nuummut nuunneqarpat.
Doris Jakobsen maanna illersornissamut ministerimut apeqqutigaa naatsorsuutigineqarnersoq, Kangilinnguani najugallit tamarmik Issittumi Sakkutooqarfiup Nuummut nuunneqarnissaanut atatillugu aamma Nuummut nuussanersut, taamaanngippat kikkut Kangilinnguani najugaqaannassanersut naatsorsuutigineqarnersoq aammalu taakku tamaaginnissagunik sulerissanersut?
Tamatuma saniatigut Doris Jakobsenip paaserusuppaa, Kangilinnguani illut qimatassat qanoq pineqassanersut sakkutooqarfiup Nuummut nuunnerata kingorna.
Aamma Doris Jakobsenip paaserusuppaa Arsummi najugalinnut angallannikkut kingunerisassaat kiisalu Kangilinnguani nakorsamik atuinerat qanoq pineqassanersoq.
Tamatuma saniatigut illersornissamut ministerimut apeqqutigaa Kangilinnguani Sakkutooqarfiup allamut nuunnerata kingorna Kujataani angallannermut sunniutissat misissorneqarsimanersut, pingaartumik Arsummik timmisartukkut sullissineq nakorsiarsinnaanermullu periarfissat eqqarsaatigalugit.
Apeqquteqaatinut tunngavilersuutaapput Doris Jakobsen Kangilinnguani najugaqartup saaffigineqarsimanera.