Akutaaneq aamma Vejle ajorsarput
Unammiuaarnermi siuarsimasunut ilaasut Ribe-Esbjerg arfininngornermi unnukkut Vejlemi unammimmata Akutaaneq Kreutzmann aamma Vejle Håndbold ilungersoraluarput
Unamminerup aallartinnginnerani Vejle Håndbold neriussimagaluarpoq tupaallatsitsisarnitik nangillugit sukalanerpaat ilaat ajugaaffigisinnaallugit. Unamminermi kingullermi Vejle tupaallatsitsilluni Odder Håndbold ajugaaffigaa.
Ribe-Esbjerg mianersortussaalluni nalunngilaa allamillu anguniagaqarami Vejle'p unammillersinnaanermik takutitsisinngitsoorlugu. Akeraat arsarluaqaat dommerillu unamminermi immikkoortut marluk 30 minutsinik sivisussusillik naatillugit siggarmata Ribe-Esbjerg 28-18-imik ajugaapput.
Akutanneq Kreutzmann unamminerup annersaani isersimavoq. Ilaatigut unamminerup immikkoortuata aappaani Vejle Håndbold målinik pingasunik kinguaqqanerata nalaani Akutaaneq isersimasoq, isiginnaartut aamma Vejlemi arsaqataasut isumaqalertaraluarput unamminermi ajugaanissamut periarfissaqalissasoq. Ajoraluartumilli Vejle sisamariarluni målit isertinneqarsinnaasut annaavai, tassanngaannarlu Ribe-Esbjerg målinik arfineq-marlunnik siuarput.
Akutanneq Kreutzmann ataasiarluni isertitsivoq unamminerullu inernera assut uggoralugu.
- Ullumikkut arsarnerluppugut. Ribe-Esbjergip torrallappaatigut ajornanngitsunnguamik illersuisugut pikkorikkaluartut ammartarpaat. Aamma unioqattaarnigut akisupput taamaattumik ajorsarpugut. Målinik tallimanik ajorsarsimasuugaluarutta pissusissamisoornerussagaluarpoq periarfissat arsarnerpullu eqqarsaatigalugu, Akutaaneq unamminerup naammassinerani oqarpoq.