Naalagaaffeqatigiit EU akerleraa

Danmarkip naalagaaffeqatigiinnermi arfanniarnermik politikkini allanngortinnianngilaa EU'lu akerlilersorlugu

EU'p Kalaallit Nunaanni qilalukkat naalagaaffiginiarpai. Tamanna Folketingip Europaudvalgiata aamma danskit naalakkersuisuisa akerleraat. Assi: Pinngortitaleriffik.

Kalaallit Nunaanni arfanniartartut Københavnimit illersugaapput. Bruxellesip nunatsinni arfanniarnermik saassussinera ippassaq Folketingip Europaudvalgianit akerlilersorneqarpoq. EU, IWC'mut siunnersuuteqarpoq, arfanniarneq - arferit angisuut mikisulluunniit pineqaraluarpata - tamarmik ataatsikkut aqunneqalernissaanik siunnersuutaa itigartitsissutigineqarpoq.

IWC maannamut isumaqatigiissut naapertorlugu arferit angisuut kisiisa isumaqatigiinniussutigisinnaavai. Nunat ataasiakkat arfernut mikisunut akisussaaffimmik namminneq tigummisut.

Nunanut allanut ministeriugallartup Margrethe Vestagerip nuannaarutigaa, Europaudvalgip naalagaaffeqatigiinnermi soqutigisanik aalajangiussimammat.

- Isummagut assigiipput. Arfanniarneq immap pissarititaanik nungusaataanngitsumik ingerlanneqarpoq, taamallu ingerlatsisoqassasoq naalagaaffeqatigiinnermi isumaqatigiissutigaarput. Kalaallit isumaqanngillat, savalimmiormiut isumaqanngillat aammalu danskit isumaqanngillat - tamatta ataatsimut isummiussaraarput. Tamanna pingaarnerpaarpaajuvoq, Margrethe Vestager tallimanngornermi Europaudvalgimi ataatsimeereernerup kingorna oqarpoq.

Arfanniarneq Kalaallit Nunaannut pingaaruteqarpoq

Kalaallit Folketingimut ilaasortaatitai tamarmik isumaqarput arfanniarneq nunatsinni innuttaasunut pingaaruteqartorujussuusoq.

- Arferit amerlavallaaleraangamik aalisagaqassutsimut assersuutigalugu qaleraleqassutsimut sunniuteqartarpoq. Nuannaarutigaara Danmarkip EU'p siunnersuutaanut akerliulluni taasimmat, folketingimut ilaasortaq Doris Jakobsen, Siumut oqarpoq.

Folketingimut ilaasortaq Sara Olsvig, IA, aamma Danmarkip Kalaallit Nunaannik Savalimmiunillu tapersersuineranik nuannaaruteqarpoq.

- Arfernik minnernik aqutsineq ilisimatuussutsikkut tunngavilimmik aqunneqarpoq. Uagut nammineq arfernik minnernut tunngasunik aalajangiisussaavugut, taakkulu IWC'imit akisussaaffigineqalissanngillat, Sara Olsvig oqarpoq.

EU'p siunnersuutaani arlalinnik maluginiagassaqarpoq. Nunat ilaasortaasut ataatsimut IWC'ip tulliani ataatsimiinnissaannut nalunaarutiginiarpaat arferit pitsaanerusumik illersorneqartariaqartut aammalu taakkununnga aqutsineq pitsaanerusariaqartoq, arfanniarneq tunisassiornertut ingerlanneqassanngitsoq kiisalu nunat tamalaat akornanni arfernit tunisassiat tuniniaqqusaannginnerat, saniatigullu isumaqatigiissutip allanngortinneqarnissaa imaasillugu, arfanniarneq qanorluunniit ittoq IWC'imit akisussaaffigineqalissasoq. Tamatuma saniatigut EU arferit eqqissisimatitaaffissaanik pilersitsiniarpoq IWC'mullu ilaasortanngorluni.

Naalakkersuisut EU'p siunnersuutaa iluarinngilaa:

- Naalakkersuisut siunnersuut nangaanartoqartippaat, taanna naalagaaffeqatigiit soqutigisaannut tulluartuunngilaq. Siunnersuut siornatigut isummiussaareersunut assinguvoq, taanna EU'mi ministerit 2008-mi aamma 2009-mi Danmarkip akerliulluni taasiffigisaanut assingummat, Udenrigsministeria ataatsimiinnernik allaaserinninnermik ilaatigut allappoq.

Powered by Labrador CMS