Nunarput sinnerlugu sisoraatinik oqilaniuttartut sungiusarput
Nunarput sinnerlugu sisoraatinik oqilaniuttartut Arctic Winter Gameseqarnissaanut Sisimiuni sungiusarput
Kalaallit Nunaata sisoraatinik oqilaniuttartui inuusuttuaqqat ulluni makkunani Sisimiuni sungiusarput nuna tamakkerlugu sungiusaasoq Erik Amondsen sungiusaasoralugu.
Inuusuttuaqqat 18-it sungiusaqatigiit 1994-imiit 1997-imut inunngorsimasuupput ataaserli 1998-imi inunngorsimasoq aamma peqataatinneqarluni.
Nuna tamakkerlugu sungiusaasup Erik Amondsenip inuusuttuaqqat neriuuteqarifigeqai.
- Manna tikillugu teknikkikkut piginnaasaqarluarnerat ersarippoq. Aatsaat taama teknikkigitsigisunik unammisartuuteqarunarpugut. Timimikkut sungiusartariaqaqaat pikkorissuuppulli qaammatini tullerni pingasuni pitsaasumik sunnerniaraanni sakkortuumillu sungiusarlugit Arctic Winter Gameseqarnissaanut 2012, imaalluarsinnaavoq Kalaallit Nunaannit aallartitagut ajugaasunut ilaaqqissinnaaasut, Erik Amondsen oqarpoq. AWG Canadami White Horse ingerlanneqassaaq.
Sungiusaqatigiinnermi programi imaappoq, ulluunerani sisoraatinik sungiusareernerup kingorna ualikkut unnukkullu nukittorsartoqartarpoq. SSP Sisimiuni sungiusariartortut inissaannik isumaginnipput, klubbilli peqataatitaqartut namminneq Sisimiuliarnissaq nerisaqarnissarlu isumagaat.
Ukioq manna sungiusaqatigiit inuusuttuaqqat 18-isut akornanni sapaatip akunnerata naanerani unammiartortussat toqqagaassapput, nuna tamakkerlugu sungiusaasup sungiusarnermit inerniliussaminit aammalu unammiuaarnerni angusat aallaavigalugit inuusuttuaqqat 12-it AWG'mut peqataasussat toqqassavai.
Inuusuttuaqqat klubbinit assigiinngitsuneerput soorlu NSP, Nuuk marlunnik ajugaasinnaasorisaminnik peqataatitaqarpoq, NUP aamma Nuummeersoq pingasunik peqataatitaqarpoq, KS-69 Maniitsoq inuusuttuaqqanik marlunnik, SSP Sisimiut soorlu Maniitsumeersutut marlunnik peqataatitaqarpoq. Nunatsinni sisoraatinik oqilaniuttarfillammak Aasiaat ASP inuusuttuaqqat sungiusartinneqarnerinut arfinilinnik peqataatitaqarpoq kingullertullu Ilulissanit ISP inuusuttuaqqat neriulluarfigisat marluk peqataatippai.
Inuusuttuararpassuit tamakku nunarsuarmi nuna tamakkerlugu sungiusaasut inuusunnersaasa ilaannit, tassalu nuna tamakkerlugu sungiusaasoq Erik Amondsenimit taassumalu ikortaanit kiisalu holdit aqutsisui inersimasullu allat peqatigalugit annerpaamik angusaqarniartitsipput.
Sungiusarnerup ingerlanerani inuusuttuaqqat nuannarinerpaasimavaat arpaffiit pitsassuit White Horse'mi unammiffissatut naatsorsuutigisatut ittumik arpatassiorneqarsimapput.