Isuani piiaaffimmut Kinamiut ingerlatsivii suliassinneqarput

London Miningip Nuup eqqaani piiaaffissap Isuata ineriartortinnissaanut kinamiunik sulisartunik tusintilikkaanik akissarsiakitsunik atuiniarnera oqallisaasorujussuuvoq. Suliniutip aallartinnissaa oqartussaasunit suli akuerineqanngitsoq London Miningip selskabit marluk piiaaffimmik, assartuinermi båndimik kilometerinik untritinik arlalinnik takissusilimmik umiarsualivimmillu sanasussat isumaqatigiissuteqarfigereersimavai.

Selskabit taakkua tassaapput Sinosteel Equipment aamma Engineering and the China Communications Construction Corp - marluullutik Kinameersut. Taamatut nutaarsiassaqartitsivimmut Reuters-imut paasissutissiivoq London Mingip pisortaanera Graeme Hossie.

Taanna ilanngullugu oqarpoq London Miningip Kinami sisaliorfinnik isumaqatigiinniuteqartoq, saviminissamik nunatsinneersumik suliarinnittussanik.

Ilanngulugu London Miningip neriuutigaa piiaaffimmik suliniummik, selskabip ukiut pingasut qaangiuppata tamakkiisumik tunisassiulernissaanik neriuutigisaanik, kinamiumik aningaasaliisumik suleqatiginnissinnaalluni.

-Suliniummut tamarmut ilaannaanulluunniit aappaagu marsi nallertinnagu suleqatitaarsinnaagutta sanaartorneq aallartissinnaavarput tunisassiornerlu 2015-ip qiteqqunnerani aallartissinnaallugu. Tamanna anguniagaraarput. Isumaqarpugut suleqatisssarput kinamiuusariaqartoq, tamannalu aamma ilimanarnersaavoq, Graeme Hossie Reutersimut oqarpoq.