Savalimmiuni anorersuarujussuartoq
Ippassaq unnukkullu Savalimmiuni anorersuarujussuarpoq. Illut arlallit qaliaat tingipput umiarsuillu ikkarlillutik
Sisamanngormat Savalimmiuni anorlingaatsiarluni aallartittoq kingusinnerusukkut anorersuannguukkiartorpoq anorip sakkortussusiata akunnermut 180 kilometerit angusalerlugit. Atortunik ajoqusernerit suli naatsorsorneqanngillat, illulli arlallit qaliaat tingipput, igalaat aserorterput umiarsuillu ikkarlillutik. Allaat anorip sakkortussusianik uuttortaatit aserorput.
- Anorip sakkortussusianik uuttortaatit arlallit aserorsimapput tingissimallutilluunniit. Ippassaq unnukkulli atorsinnaajunnaarput, Torshavnimi Politiini pigaartoq oqarpoq.
Savalimmiut tamarmi eqqorneqarpoq, kujasinnerusortaali sakkortunerusumik.
Anorersuaq sakkukilliimivoq anorlingaatsiarnerali ualeq naallugu ingerlaqqissaaq. Innuttaasut upalungaarsimanermut oqartussaasunut politiinullu suli sianeqattaarput ajoqusernernik nalunaarutiginnillutik.
Ualeru kingusinnerusukkut aatsaat anorersuup aseruinerata annertussusaa takuneqarsinnaalissaaq.