Suiaassuseqatiminnoortut oqaluffinni angersinnaalerput
Katisitsinermi rituaalip allanngortinneratigut naalakkersuisut qulakkeerpaat suiaassuseqatiminnoortut oqaluffinni katitinneqarsinnaalernerat
Aasamut suiaassuseqatigiit aappariit siulliit, aappariittut inooqatigiinnissaminnut Danmarkimi oqaluffinni akuerisaallutik katissinnaalissapput. Danskit naalakkersuisuisa inatsiserpaaluit allanngortinnerisigut aappariit suiaassuseqatigiit aappariittut nalinginnaasutut pisinnaatitaaffeqalissapput, Politiken allappoq. - Oqaluttuarisaanermi allanngortitsinissarujussuaq pissaaq, taamani arnat oqaluffinni palasinngortinneqarsinnaalermatali aatsaat taama allanngortitsisoqaqqitsigissaaq, naligiissitaanermut ilageeqarnermullu ministeri Manu Sareen (R) aviisimut oqarpoq.
Ilagiit lutherikkuusut maannamut aappariit nalinginnaasut suiaaqatigiillutillu aappariit naligiimmik pineqarnissaat akuerinikuunngikkaluarpaat. Maannakkulli biskoppit katisitsinermi ritualimik allanngortitsinissamut allakkioqataapput, siunissami suiaaqatigiillutik aappariit palasinit katisinneqarsinnaaleqqullugit.
Københavnimi biskoppi, Peter Skov-Jakobsenip aalajangiussineq iluaraa: - Ilimagaara ilagiinni ilaasortarpassuit aalajangiussineq qujarukkaat, kiisami politikkikkut aalajangertoqarmat aqqut sorleq ingerlariarfigissaneripput. - Aammali arlalippassuit nuanniilliussapput katissimasutut imaluunniit aappariittut nalunaarsorsimasutut assigiinngissutaanik peersitsinissaq tunngavigalugu, Peter Skov-Jakobsen Politikenimut oqarpoq.
Nutaaliornissap taassuma katinnermi inatsimmik allanngortitsinissaa pisariaqarpoq tamatumalu kingorna katinnermi ritualip nutaarluinnaq pisariaqartinneqassaaq, suiaassuseqatigiinnut aapparinnut naleqquttoq. Politiken naapertorlugu aappaariit aappariilivinnissamik aperineqartalissapput. Ullumikkut suiaassuseqatigiit palasinit pilluaqqutittarput rådhusini aappariittut nalunaarsorneqarnermik kingorna.
Peqatigiiffimmi Landsforeningen for Bøsser, Lesbiske, Biseksuelle og Transpersoner nuannaajallatigineqaqaaq:
- Neriuutigisarput sinnerlugu tusarlerneqarpugut. Oqaatsit isumatoorujussuupput, ullumikkut katissimasutut taaneqarsinnaannginnermut naligiinngisitsinermut ilisarnaataavoq, siulittaasoq Vivi Jelstrup Politikenimut oqarpoq.