Tuusi 70-iliissaaq
Nunatsinni nutaaliaasumi pisoqasaanngortup Josef "Tuusi" Motzfeldtip utoqqalinersiaqarnissamut ukiorititat qaangereersimagaluarpai tamannali Inatsisartuni siulittaasoq takugaanni malunnanngilaq
Nunatsinni naalakkersuinermik suliaqartutoqaq Inatsisartunilu siulittaasoq Josef Motzfeldt sisamanngornermi novembarip 24-ani 70-inik ukioqalissaaq, taamaalilluni nunatsinni naalakkersuinermik suliaqartuni angajullersaalluni. Kisianni kigaallannissamik pilersaaruteqarpasinngilaq.
Namminersornerullutik oqartussat 1979-mi eqqunneqarneranniit ukiut tallimaannaat ingerlareersut Uummannami atuarfiup pisortaa Nuummukartinneqarpoq, niuernermut, angallannermut inuutissarsiornikkullu ilinniartitaanermut naalakkersuisunngoriartorluni, kingornalu Josef Motzfeldtip "Tuusimik" taaneqartartup inuunerani naalakkersuinermik sulineq qitiulerpoq, 1987-mimi inatsisartunut qinigaavoq.
Inuit ilaasa Josef "Tuusi" Motzfeldt 1994-miit 2007-mut Inuit Ataqatigiinni siulittaasuusoq saamerliuniarluartutut isigisarpaat. Kisianni piviusunik tunngaveqarluni naalakkersuinermik sulineq nuimasullu akornanniinnissaq sungiusimalluarpaa.
2004-mi USA-mi nunanut allanut ministeri siullermeertumik nunatsinnut tikeraartippaa. Tamanna pivoq taamanikkut USA-mi nunanut allanut ministeriusup Colin Powellip Danmarkimi taamatut sulisoq Per Stig Møller (K) Josef Motzfeldtilu peqatigalugit kalaallip naalakkersuinermik suliaqartup inunngorfiani Igalikumi isumaqatigiissut atsiormassuk.
Inatsisartuni siulittaasunngorlaalluni Josef Motzfeldtip juunip 21-ani 2009-mi Nuummi namminersorneq pillugu inatsit dronningimit Margrethemit tiguaa.
Josef Motzfeldt toqoreersumik Jonathan Motzfeldtimik aataqqeqqeqqeqatigiittoq novembarip 24-ani 1941-mi nunatta kujataani Igalikumi inunngorpoq, angutaa savaatiliulluni. Danmarkimi ilinniarpoq. Uumasut nakorsanngorniarnissaminiit angerlarusunneruvoq.
Hjørring Seminariumimi ilinniartitsisutut ilinniarpoq ukiunilu arlalinni kalaallinut Danmarkimi efterskolertunut ilinniartitsisuuvoq Kalaallillu Nunaannut uteqqilluni, tassanilu naalakkersuinermik suliaqalerluni. Ullumikkut nalliussisup qingumut qiviarluni takusinnaavaa 1984-mi naalakkersuinermik sulialinnit kisiartaalluni suli taamatut suliaqartuulluni.
"Tuusi" nunatsinni arlaleriarluni naalakkersuisunut ilaasortaasimavoq, taamaattorli naalakkersuisunut siulittaasunngorsimanani. Kisianni 2009-mi Inatsisartunut siulittaasunngortussaalluni tamakkiisumik tapersersorneqarpoq.
Aviisimut Sermitsiaq Josef Motzfeldt inuuissiornerminut atatillugu oqarpoq utoqqanngortinnani utoqqaanissaq peqqutissaqanngitsoq. Utoqqalinerlu peqqutigiinnarlugu utoqqarsuartut pissusilersortariaqanngitsoq.
80-iliinissani qilanaaraa, 100-liinissamimi anguniagaraa.