Akunnittarfiutilissuit alliliiniarput
Carl Juhl Helge Tangilu, illoqarfiit pingaarnersaanni neriniartarfiit amerlanersaannik piginnittooreersut, nunatsinnilu akunnittarfiit annersaannik ingerlatsisut, Nuummi 40 millioner koruuninik aningaasaliissuteqarniarput
Hotel Hans Egede A/S-ip novembarip 17-ianni Pisiffik A/S-ip pisiniarfissuata, akunnittarfimmut affarliup, annersaa 40 millioner koruunilerlugu pisiaraa.
Pilersaarutaavoq Hotel Hans Egedep ininik nutaanik 20-nik allineqassasoq nutaaliaasumillu pikkorissartarfimmik ataatsimeersuartarfimmillu 1.600 m2-inik angissusilimmik, ataatsimeersuartunut 350-inut inissalimmik, sananissaq. Akunnittarfiup maanna pikkorissartarfiata ataatsimeersuartarfiatalu 400 m2-inik angissusillip allissutissaa.
Pikkorissartarfik ataatsimeersuartarfillu atortunik eqqarsaatigineqarsinnaasunik tamanik atortoqassaaq, atatsimiinnermilu ataatsimeersuarnermilu atortunik nutaaliaanerpaanik atortulersorneqassalluni. Anguniakkat ima annertutigaat HORESTA-p naliliisarnerani ullorissat ataatsimik ilaniarneqarlutik, taamaasilluni illoqarfiit pingaarnersaat pikkorissartarfimmik ataatsimeersuartarfimmillu tallimanik ullorialimmik peqalissalluni.
- Nuummi suariartorfiusumik napasulialiussaagut pikkorissarnermi ataatsimeersuarnermilu pioreersunut tapertaaginnassanngitsumik, aammattaarli avataanit tikittartunik amerlanerusunik orniginnilersitsisussamik, akunnittarfiup pisortaanera Helge Tang oqarpoq.
- Pikkorissartarfimmik ataatsimeersuartarfimmillu pilersitserusuppugut, Nuup nunani avannarlerni ataatsimiittarfittut ilisimaneqaateqalissutissaamnik.
Illu ukioq manna decembarip 30-ianni tiguneqassaaq. Init Pisiffimmut attartortinneqassapput 2012-imi aggustip aallaqqaataata tungaanut, tamatumalu kingorna sanaartorneq aallartinneqassaaq. Pikkorissartarfik ataatsimeersuartarfillu tallimanik ullorialik 2013-imi upernaakkut sanallugu naammassisimassaaq.