Nuummi "umiarsuarmik ajutoorneq"
Umiarsuaaraq alapernaarsuut "Tulugaq" "Sungiusarneq Tappik"-mi peqataassaaq. Pisarnertut sungiusarneq ullumi aallartissaaq
Tamarmik peqataassapput sakkutuut imarsiortut politiillu sapaatip akunnerani uani Nuup eqqaani sungiusarneranni.
Taamatut paasissutissiivoq Kangilinnguani Sakkutooqarfik. Sungiusarneq ullumi aallartissaaq peqataassappullu sakkutuut imarsiortut umiarsuaat "Knud Rasmussen" aamma "Tulugaq" ilagalugit politiit angallataat "Sisak", "Sisak II", "Sisak III" kiisalu "Sisak IV", 2011-imi Sungiusarneq Tappik aappassaa ingerlanneqarnerani.
Sungiusarneq taanna taamatut sungiusarnerit 25-issaraat, tamakkunani sakkutuut imarsiortut politiillu suleqatigiinnerat sungiusarneqarlunilu aserfallatsaalineqassalluni.
Umiarsuit inuttaasalu pisarnertut sungiusaatigissavaat umiarsuup allap putusimasup, ikuallattup ikilertissimasunillu ilaasullip ikiorsernera. Aamma imaami ujarlernermik annaassiniarnermillu sungiusartoqassaaq.
Nunami ikiueqqaarnermik ilinniartitsisoqassaaq kiisalu ikuallattuusaartitsisoqassalluni, tassani umiarsuarni røgdykkierit Nuummi Qatserisartut ikiortigalugit putsumut pulanermut sungiusassallutik.
Sungiusarnermi pikkunarnerpaassaaq umiarsuarmi ajunaarnersuaqartuusaartitsineq, tassani peqataassallutik RCC Søndrestrøm Fjord, Politimestereqarfik, Peqqinnissaqarfik, Royal Arctic Line (Arctic Umiaq Line) nunamilu arlallit. Sungiusarneq naassaaq novembarip 25-ianni.