Rasmus torlusortartulerluni
Sapaatiummat unnukkut tusarnaariat 400-t nipilersornermik misigisaqartinneqarput Rasmus Lyberth Aalborgimi Ansgar Kirkemi tusarnaartitsimmat
Midtjyllandimit, Vestjyllandimit, Vendsysselimit soorunamilu Aalborgimit tusarnaariat 400 missaanniittut nipilersornermik nuannersumik misigisaqartinneqarput Rasmus Lyberth & Band Aalborgimi Ansgar Kirkemi siusinaartumik juullimut tusarnaartitsimmat.
Ukiut aappassaa ingerlatiinnarlugu Rasmus Lyberth Aalborgimi Ansgar Kirkemi tusarnaartitsivoq, neriunartumik ileqqunngortussamik Rasmus Lyberthip qaqutigoortumik erinagissorsuup tamanna sapinngitsillugu. Sapaatiummat unnukkut erinaa sumilluunniit ajorseriarpasissimanngilluinnarpoq. Akerlianik ukiut ingerlaneranni erinagissiartuinnavippoq. Taamaasilluni Rasmus Lyberth ukioq manna 60-iliisoq 1951-imeerluartuuvoq, Rimdal Th. Høegh allappoq.
Rasmusip sapaatiummat juullimut tunissutaa tassaavoq tupaallatsitsilluni torlussortartumik Ydre Mongoliet-imeersumik aliikkusersuisitsinera, taanna immikkut illuinnartumik ataatsikkut ernarsorluni, uingiarsorluni qatimaluttarlunilu. Nipit inuit Mongoliet-ip inuiinik eqqarleqarnerannik takutitsisut.
Rasmusip unnuk taanna erinarsugai nutaajupput ilaallu ilisarnartuullutik qatsunneqanngisaannartut, erinarsugaasalu ilagaat "Erningaa", "Juullimii Qiimasut", Rasmusillu killitsinnartumik namminerluinnaq atortagaa "Guutiga illimmi" - Unnuk nalissaqanngitsoq.