Nuummi Ukaliusami atuartut seqersitanik takutitsisut
USK'imi 7. klassini atuartut siulit qullernik seqersitsinikkut oqaluttuartippaat
NIPI & QAAMASOQ SAGA / MIN SAGA qullernik seqersitsilluni takutitassiaavoq immikkuullarilluinnartoq. Kulturikkut illorsuup paarlersuani, isaariaata iigaani aammalu Nuummi blokkit 6 aamma 7, taarsigaangat seqersitsissutit atorlugit qaammarsarneqartarput.
Karen Thastum aamma suleqatigiit Tura Ya Moya'mik imminnut taasut nipilersugaat qullernillu suliaat nunarsuarmi tamalaani ilisimaneqartut, assilialiortartoq Julia Pars aammalu Ukaliusami 7. klassini atuartut, meeqqallu allat Tunumit, Kitaanit aamma Danmarkimeersut siuaat eqqarsaatersuutigisimavaat: Suminngaanneerpunga sumukalerpunga?
Suliaq nalinginnaanngilluinnartoq inuunernit assigiinngilluinnartunit pinngortinneqartoq.
Novembarip 30-ata tungaanut seqersittakkanit saqqummersitat aamma Kalaallit Nunaanni sumiiffinni allani qullernik seqersitsisarluni aaqqissuussanit assilisat Katuap paarlersuani aamma silami blok 6'ip aamma 7'ip iigaanni taarsineranit takuneqarsinnaapput.
Taama aaqqissuussineq Tunumi, Danmarkimi aamma Qeqertarsuarmi ingerlanneqareerput.
2010-mi NIPI & QAAMASOQ SAGA, Tasiilami, Kulusummi aamma Tiniteqilaami - Tasiilami Katersugaasivik suleqatigalugu takutinneqarpoq, 2011-mi Qeqertarsuarmi katersugaasivik suleqatigalugu tamaani takutinneqarluni. Nuummi takutitsinerni ilaatigut takuneqarsinnaapput katersugaasivinni suliat aamma inuusuttut suliniummi peqataasut sammisaat. Nuummi Ukaliusami atuartut siulitik qanoq ittuunersut takorluukkaminnik takutitsipput, Karen Thastum oqarpoq.
2012'ip ingerlanerani seqersittaanermik suliniutillit Ilulissanut aamma Reykjavik'imut ingerlaqqissapput ilataatigut NAPA'mit taperneqarlutik.
Suliniarnermik aqutsisut namminersorlutik oqartussanit aamma Kommuneqarfik Sermersuup kulturikkut aningaasaateqarfiannit aamma Danmarkimi Kunststyrelsemit tapersersorneqarput.
Assit assiisivimmi takukkit.