Facebookimi ikinngutit oqalliseqataaqquneqarput

Air Greenlandip Facebookimi ikinngutini tamaasa timmisartukkut angallanneq pillugu politikkerit ilagalugit oqallinnissamut qaaqquai

Air Greenlandip Facebookimi ikinngutini oqallinnissamut peqataaqquai. Assi: Leiff Josefsen

Marlunngornermi Air Greenland silaanakkut angallanneq pillugu oqallitsitsaaq Michael Binzer politikkerinik ilalerlugu peqataaffigisassaannik.

Maanamut suli oqaatigineqanngilaq politikkerit kikkorliit peqataatinneqassanersut.

Air Greenlandimit naatsorsuutigineqarpoq makku ilaatigut apeqqutigineqassasut:

Nuumi sila ima aalaakkaatigaa timmisartorsuarnut tamaani mittarfiliortoqarsinnaalluni?

Nuup Akiani mittarfik inissinneqassagaluarpat ajorpa?

Mittarfik takineq billitsinik akikinnernik nassataqassava?

Nuummi najugaqaruit apeqqutillu tamakku ilaat akissutissarserusullugit, taava marlunngorneq novembarip 22-at akissutisinissannut periarfissaqarputit, Air Greenland Facebookimi quppernermini allappoq.

- Kikkulluunniit "Synes godt" facebookikkut naqitsisimasut nunatsinni angallannermi siunissaq pillugu oqalliseqatigerusuppagut - pingaartumik Nuummi timmisartoqarfiup ineriartornissaa isiginiarneqassaaq.

- Illoqarfimmi politikkerit oqallinnissamut peqataaqqullugit qaaqquagut, aamma Michael Binzer Air Greenlandip sammisamut isummiussaa pillugu nassuiaassaaq.

Aaqqissuussineq unnukkut ingerlanneqassaaq.

Ulluni tullerni facebookikkut malinnaagit sumiiffissaq piffissarlu nalunaarutigineqassammata, angallanneqarnissamut periarfissat politikkerillu kikkorliit peqataassanersut il.il. Isummersoqataagit Air Greenland Facebookikkut kaammattuivoq.

Powered by Labrador CMS