Oqallisissiaq: Innuttaasunik suusupaginninneq kanngunartoq

1,3 milliardinik isertitsisinnaanermik siunnersuusiorneq innuttaasunik sianiinnaarinninniarneruvoq, innuttaasunut suusupaginninnermik sakkortuumik ersersitsisoq, Inuit Ataqatigiit inatsisartuni ilaasortai isummiussaat oqallisissiami uani atuarneqarsinnaavoq

Juliane Henningsen, Aqqaluak B. Egede aamma Olga P. Berthelsen isumaqarput illuatungiuliuttut innuttaasunik pututitsiniartut: Assi: Leiff Josefsen

Inuit Ataqatigiit inatsisinik unioqqutitsinianngillat. Aamma Inuit Ataqatigiit siusinnerusukkut isumaqatigiissutaareersunik illuinnaasiorlutik atorunnaarsitsinianngillat, tamannami siunissami aatsitassarsiornermik isumalluuteqarniarluni inuiaqatigiinnik ineriartortitsinermut unitsitsissussaavoq.

Illua’tungiliuttut siunnersuusiarisimasamittut taavaat, ukiuni tulliuttuni 1,3 mia koruuninik isertitsisinnaallutik, tamannali pitsaanerpaamik taaneqassaguni assersuusiarineqarsinnaavoq piaaraluni innuttaasunik neriulussinnartitsiniaanertut paasisimaqanngilluinnarnertut utoqqatsissusissanngikkaanni.

Isumaqatigiissutinik unioqqutitsineq

Siullertut taasariaqarpoq aatsitassarsiortunik isumaqatigiissutaareersut pineqarmata, siunnersuutigineqartoq saqqummermat inatsisilerituunik misissuititsisoqarpoq, taakkulu imak naliliipput:

”Taamaakkaluartoq tamanna pissagaluarpat naliliinerput malillugit Namminersorlutik Oqartussat pisinnaatitsissummik pigisaqartut inatsisini aalajangersakkanik akuersinerup atuutsilernerullu malitsigisaanik aningaasaqarneranut taarsiisussanngortinneqarsinnaanerat annerusumik aarlerinaateqarpoq.”

Takorlooruminarpoq qanoq nunarput siunissami isumaqatigissutinik allannguillattaalissagaluarpat suleqatigiserissallugu pilerinartigilissanersoq, taamaakkaluartorli illua’tungiliuttut uteriiserlutik unnerput ukiuni tulliuttuni akileraarutinik akitsuutinillu isertitsinissat katillugit 1.3 milliartinik isertitsiviusussaasut, uffa qularnanngivissumik isumaqatigiissutaasut unioqqutinneqarnermikkut isertitsiviusinnaanerat unissasut.

Tupinnarluinnartorli pissagaluarpat, tassa soorlu Cairn Energy ukioq manna 500 mio koruuninik isumaqatigiissutaariinngitsunik akiliiumassagaluarpat, taava Namminersornermut inatsimmi isertitanik agguataarinermut aalajangiussaq atuutilissagaluarpoq, tassa isertitat 75 mio. koruunit siulliit isertissavagut kisiannili sinneruttut naalagaaffillu avinneqartussanngussapput, taamaalilluni illua’tungiliuttut siunnersuutaat sutigulluunniit piviusunngorsinnaajunnaassalluni.

Avitseqatigiinnerlu isumaqatigiissutaasinnaasasappat siusinnerpaamik siunnersuutigineqartut 2013-imi 2014-imilu atuutilersinneqarsinnaassapput.

Kinguaassavut sallunaveeqqusiliullugit

Illua’tungiliuttut siunnersuutigisaanni aamma atuarneqarsinnaavoq ukiumut 60 mio. koruuninik isertitsissutaasinnaasunik akileraarutinik isertitsissamaarneq, tamannalu missingersuusiornermi mianersortumik periuseqarnissaq unioqqutinneqarluinnarluni. Taamatut missingersuusiornerup tamakkiisumik takutippaa siunissami aningaasartuutissaanut matussutissaasut pissusiviusunik qulakkeerinninniarnani ingerlanniarneqartut, taamaalillunilu akiliisussat tassatuaassasut kinguaavut. Kinguaavut sallunaveeqqusiunniarneqarput.

Powered by Labrador CMS