Qeqertarsuup tunuani timmisartumik angalaneq akisoqaaq
Qeqertarsuup tunuani qulimiguulimmik kiffartuussinissamut akissqartoqanngilaq, Qeqertarsuup tunuani angallanneq pillugu aaqqissuussinerup pitsanngorsarneqarsinnaanera pillugu Siumumeersup Kristian Jeremiassen-ip apeqqutaanut Jens B. Frederiksen taamatut akissuteqarpoq
- Qeqertarsuup tunuani imaatigut angallassinermut taarsiullugu timmisartukkut angallaasisoqartarnera qaammatinik marlunnik sivitsornerqaraluarpat, tamanna annertuumik aningaasartuutaassaaq. Angallannermut Naalakkersuisoq Jens B. Frederiksen, Qeqertarsuup tunuani illoqarfiit minerit akornanni timmisartukkut angallasisarneq decembarip aallaqqaataaniit oktobarip aallaqqaataanut siuartinneqarpat, tamanna qanoq akeqassanersoq, Inatsisartuni ilaasortap Kristian Jeremiassen-ip apeqqutigimmagu taamatut akissuteqarpoq.
Kiffartuussinissamut isumaqatigiissut naapertorlugu tamaani decembarip aallaqqaataaniit maajip qeqqata tungaanut timmisartuussisoqartarnera Namminersorlutik Oqartussat ukiumut 13,4 miliuuni koruuninik tapiiffigisarpaat.
Jens B. Frederiksen isumaqarpoq, Qeqertarsuup tunuani timmisartuussineq annertusineqarpat akitsorsaataassaqisoq, qanoq annertutigisumik akitsorsaataassanersoq oqaatigisinnaanngikkaluarlugu.
- Tamatumunnga pissutaavoq, isumaqatigiinninniarnikkut tamassuma anguniartariaqassanera pissutigalugu, Frederiksen nassuiaavoq.
Jens B. Frederiksen-illi neriorsuutigaa, 2013-imi kiffartuussinissaq pillugu isumaqatiginninniartoqalerpat, Qeqertarsuup tunuani angallassinermi pissutsit allanngortinnerisa qanoq akeqassanerat misissorumaarlugu.
- Allannguisoqassappalli maannakkut aningaasartuutissatut killigititat iluanni tamanna pisariqassasoq ilanngullugu oqaatigaa.
Qeqertarsuup tunuani timmisartukkut imaatigullu angallassinerit akikillisarnissaannik Naalakkersuisut pilersaaruteqarnersut aperineqarami, Jens B. Frederiksen toqqaannartumik akinngilaq, Nunatsinnili timmisartukut angalaniarnerup akisunerujussua eqqartorlugu. Taamaammat Qeqertarsuup tunuani angallannerup akikinnerulernissaa pilersaarutigineqarunganngilaq.
Jens B. Frederiksen oqarpoq:
- Ilumoorputit oqaravit angallanneq - Qeqertarsuup tunuaniinnaanngitsoq, Nunatsinnili tamani akisoorujussuusoq. Tamanna sumi najugaqartitersianitsinnik pissuteqarpoq: Inuit 60.000-it 2 miliuuni km²-tut atsigisumi najugaqartiterlutik siaruarsimappata, assartuinermut atassuteqaqatigiinniarnermullu akit qaffasittorujussuussapput. Aasianniilluunniit Qasigiannguillu akornanni angallanneq eqqarsaatigingaluaraanni, tamaanimi akinik matussusiisinnaasut ikittuararsuupput.
Jens B. Frederiksen-ip Kristian Jeremiassen nassuiaateqarfigalugu oqarfigaa, Qeqertarsuup tunuani timmisartukkut imaatigullu angallassisarneq kiffartuussinissamut isumaqatigiissut naapertorlugu ukiumut 19,6 miliuuni koruuninik tapiiffigineqartartoq. Taamaammat ilaasut angallannermut aningaasartuutit ilaannaat akilertarpaat.
- Kiffartuussinermut isumaqatigiissuteqartoqaqqilerpat inunnik angallassinermut atatillugu maannakkut aningaasartuutissatut sinaakkutigineqartut iluanni tamanna pisussaavoq. Taamaammat ullumimiit annertunerusumik tapiissuteqartarnissaminnut Naalakkersuisut periarfissaqanngillat, Jens B. Frederiksen naqissusiivoq.