Avataani qaleralinniarneq unitsinneqarli

- Taamaasilluta nungusaataanngitsumik qaleralinniarneq qulakkiissavarput tamannalu peqatigalugu Qaasuitsup Kommuniani suliffissaaleqineq qaangissallutigu, Siumut tunuliaqutaralugu Qaasuitsup Kommuniani kommunalbestyrelsimut ilaasortaq Bernhardt Olsen isumaqarpoq

Qaasuitsup Kommuniani qaleralittassat tamarmik sinerissamut qanittumi aalisartunut tunniunneqassapput. Tamanna suliffinnik pilersitsissaaq nungusaataanngitsumillu aalisarneq qulakkeerneqassalluni, Bernhardt Olsen isumaqarpoq. Ass.: Leiff Josefsen

- Baffin Bugtimi Davis Strædimilu kilisaatinik qaleralinniarneq ingerlaannavik unitsinneqarli pisassallu sinneri sinerissamut qanittumi aalisarnermut nuullugit, Qaasuitsup Kommuniani kommunalbestyrelsimut ilaasortaq Bernhardt Olsen oqarpoq.

- Tamatumuunakkullu qulakkeerneqassaaq Qaasuitsup Kommuniani suliffiit 700-t ukiup sinneranut qulakkeerneqarnerat, taanna oqarpoq.

- Tamanna peqatigalugu 2012-imi avataani qaleralittassat 13.000 tonsit tamaasa sinerissamut qanittumi aalisarnermut nuunneqartariaqarput. Taamaasilluni sinerissamut qanittumi pisassat 33.000 tonsinngussapput, Qaasuitsup Kommuniani ingerlatsivinni pingasuni agguarneqartussat. Tamatuma kinguneranik kommunimi suliffissaaleqisuerutingajavissaaq, Bernhardt Olsen tikkuaavoq.

- Nalunngilarpummi qalerallit avataaniittut kangerluit qaleralinnik pilersortaraat, taanna ilanngullugu oqarpoq.

Tamanna peqatigalugu nungusaataanngitsumik qaleralinniarneq ujartorpaa. Taamaattumik avataanik kilisalluni qaleralinniartoqartariaqanngilaq, taanna isumaqarpoq.

- Tassami avataani qaleralinnik kilisannermi qaleraleerarpassuit saniatigut pisarineqartarput. Aalisariaaseq tamanna unitsittariaqarpoq, nungusaataanngitsumik aalisarneq attatiinnarniassagatsigu, Bernhardt Olsen tikkuaavoq.

Powered by Labrador CMS