Minik Jakob-ilu pingaarnertut inissipput
Sapaatiummat Odense Idrætshalimi tusintit sinnerlugit isiginnaartoqarluni unamminermi TMS Ringsted Sjællandimeersoq 33 - 26-imik ajorsartinneqarpoq
Minik Dahl Høegh Jakob Larsenilu pisarnertut pingaanertut inuttaralugit HC Fyn-ip ajugaasarnini nangippai.
Inernissaa pissanganarsinngisaannarsimavoq. HC Fyn akeqqaminit sukalaneruvoq. Ajugaanissaq tunngavilerneqarpoq 4 - 1-imik, 8 - 4-mik, 11 - 6-imik, 16 - 8-mik muminnermilu 18 - 10-mik siuarsimasarnikkut. Unamminerup immikkoortuata aappaani HC Fynip sukalanerunini attatiinnarpaa, TMS Ringsted 25 - 16-imiit 26 - 22-imut angusaaleraluartoq. Silatusaartumik time-out-ernikkut pissutsit iluarsineqarput HC Fyn-ilu qularnaatsumik 33 - 26-imik ajugaavoq.
Unamminerup kingorna Jakob Larsen naammagisimaarinnippoq.
- Aatsaat aappassaa HC Fyn Odense Idrætshalimi unammivoq, taamaakkaluartoq isiginnaariat tusintit sinneqarput, aammalu tusaasinnaallugulu takusinnaasimavara isiginnaariat naammagisimaarinnittut, taamaattumik tullianik Odensemi unammilerutta ilimanarpoq amerlanerpaartaat takkuteqqikkumaartut. Minik Dahl Høegh unammilluartorujussuuvoq. Isertitseriallaqqippoq, stregimut tunniusseriallaqqilluni minnerunngitsumillu illersuilluarluni. Arfineq-marlunnik isertitsivoq.
Isiginnaartut kalaalerpaalunnik ilaqarput pissangallutik malinnaasunik. Ilaatigut ilaqutariit Mikael Lyberthikkut Maniitsumeersut, aataa aanaalu ilagalugit Odensemiittut ernermik Gerthip 25-iliinera nalliussiartorlugu.
HC Fyn 1. divisonimi pissanganartorujussuarmik siuttunut ilaavoq klubbit sisamat siuttuullutik tassaasut Ribe-Esbjerg, Odder HB, HC Fyn aamma GOG, tamarmik 14-inik pointinnassimasut. Ribe-Esbjergili ataatsimik ikinnerusumik unammisimalluni.
- Maanna ajugaanersiulaariarluta sapaatip akunnerata naanerani tullermi Gudme-mi GOG-imut unammersuarnissamut aqagu piareersaleriissaagut. Pissanganassaqaaq. Tusarsimavara Gudme Hallerne-mi inissat tamangajammik tunineqareersimasut, Jakob Larsen naammagisimaarinnittoq oqarpoq.