Kina'mut tikeraarneq iluatsilluartoq

Kinami aatsitassanik niuerfinnut ammaassineq pilersinneqarpoq, aatsitassanut tunngatillugu Kinami naalakkersuisunut taakkulu aqutsisoqarfiinut attaveqalerneq pilersinneqarpoq minnerunngitsumillu nunatsinni aatsitassarsiorumallutik aningaasaliiniartunut periarfissat suuneri Kinami saqqummiunneqarput. Taama nalunaaruteqarpoq inuussutissarsiornermut, aatsitassanut suliffeqarnermullu naalakkersuisoq Ove Karl Berthelsen, tusagassiivinnut allagaqarpoq Kinamut angalareernermi kingorna.

- Pingaarnerpaamik qulakkeerumasimavarput Kinami niuerfiusinnaasunut annertoorujussuarnut nunatsinniit siunissami aatsitassatigut niuerutigilersinnaasatta soorlu saviminissaq Isukasianit, Zink aqerlorlu Tunup avannaarsuanit, aatsitassat qaqutigoortut allallu tunitsivissiornissaat. Aatsitassatigut suliniutini annertoorsuarni sanaartornerup nalaani kiniserinik sulisoqarsinnaanissaq aamma periarfissaavoq, taamaattumik Naalakkersuisuniit pingaartipparput Kinami naalakkersuisunut attaveqalernissarput. Oqarsinnaavugut Kinaliarpugut naggorissaajartorlutalusooq, tamannalu iluatsilluartorujussuuvoq, Inuussutissarsiornermut Aatsitassanullu Naalakkersuisoq Ove Karl Berthelsen naliliivoq.

Taanna ilaatigut atorfilittani peqatigalugit Kinami Tianjin-imi aatsitassat aatsitassarsiornerlu pillugit nittarsaassinersuarmi ulluni 6. – 8. november-imi peqataanerminit angerlamut uteqqammivoq.

Taqqavaniinnermini Naalakkersuisoq Ove Karl Berthelsen pisuussutinut nunamullu ministerimut tullersortimik Wang Min-imik ataatsimeeqateqarpoq aamma Kinami oqartussaasunik apeqqutinut Issittumut tunngassuteqartunik suliaqartunik ataatsimeeqateqarluni.

Aamma Naalakkersuisoq Ove Karl Berthelsen Beijing-imi nunami premierministerimut tullersorti Li Keqiang naapeqatigaa. Tamatuma takutippaa Kinap niueqateqarnissamik pimoorussinera.

China Mining Congress & Expo-mi peqataaneq iluatsilluarpoq, tusagassiivinnut allakkami atuarneqarsinnaavoq.

Kalaallit Nunaat peqataarngaarpoq immikkut nunatsinnut sammititsisoqarluni ulloq 7. november 2011, tamatumani nunatta aatsitassarsiornikkut periarfissarititai saqqummiunneqarlutik. Nunatsinniit suliffeqarfiit soorlu Air Greenland, Royal Arctic Line allallu Tianjin-imi saqqummersitsinersuarmi peqataapput.

China Mining Congress & Expo aqqutigalugu saqqummersitsarnersuit ukiualunnguit ingerlanerinnaanni aatsitassanut aatsitassarsiornermullu tunngatillugu saqqummersitsisarnerit pingaarnerit ilagilersimavaat, matumani ujarassiornikkut misissuisarnerit, piiaasarnerit, suliarinneqqiisarnerit aningaasaliinertaanullu tunngassuteqartut tamaasa sammineqartarlutik. Saqqummersitsinersuarmi 5000-nit amerlanerusut peqataapput, saqqummersitsiviit 600-nik amerlanerusut nunanit assigiinngitsunit 60-init nittarsaassivigineqarlutik.

Issittoq ukiuni kingulliunerusuni nunarpassuarnit soqutigineqaraluttuinnalerpoq, Kinalu taakkununnga ilaavoq. Kina nunanut arlalissuarnut Issittumi Ataatsimiititaliap ataani aalajangersimasumik alaatsinaattutut ilaasortaalernissamik qinnuteqartunut ilaavoq. Kinap qinnuteqaataa Issittumi Ataatsimiititaliap ataani ministerit 2013-imi ataatsimiinnissaanni aalajangiiffigineqassaaq.

Powered by Labrador CMS