Immami sikorasaartumi sungiusarneq tulluartoq
Qeqertarsuup kitaani annertuumik uuliakoortoqarneranik sakkutuut pisuussaartitsipput, uuliamik assartuussuaq iluliarsuarmut aporsimasuusaartillugu
Marlunngormat novembarip 8-ani 2011 nunatsinni sakkutooqarfik issittup imartaani uuliamik assartuussuaq ilulissamut aporsimasuusaartillugu sungiusarput.
Tassani siunertaavoq paasiniarlugu sakkutuuniit qanoq sukkatigisumik qisuariartoqarsinnaanersoq, ilaatigut uuliakoornerup akiorniarnerani qanoq sukkatigisumik atortussanik immikkullu ilisimasalinnik pissarsisoqarsinnaanersoq paasiniarneqarluni. Taama nalunaarpoq nunatsinni sakkutooqarfik nittartakkamini.
Nunatsinni sakkutooqarfiup aamma misissorusuppaa Kalaallit Nunaanni Canadamilu suleqatigisat attaveqarfissatut paasissutissaatai nutartigaanersut, suleqataasullu saliinermi ikiuussinnaanissamut piereersimanersut.
Sungiusarneq marlunngornermi novembarip 8-ani ullaakkut qungiluanut aallartippoq. Pisoq nunatta kitaani Qeqertarsuup avataani pisuusaartinneqarpo, 3 sømilit avataanni uuliamik assartuussuaq iluliarsumarmut aporsimasuusaartinneqarluni, tamannalu nunatsinni sakkutooqarfiup akisussaaffigaa. Nunatsinni sakkutooqarfiup imaq 3 sømilit avataaniittoq 200 sømilit tungaannut akisussaaffigaa.
Pisuusaartitami umiarsuaq uuliamik assartuut apornermigut marlunnik putusimavoq, uuliamillu ikummatissamik (heavy fuel) usilluni. Piffissap sivikitsuinnaap ingerlanerani uuliam 100 tonsi immamut kuuppoq taamaattumik katersorniarnissaanut ilungersortoqartariaqarluni, sakkutooqarfikallappoq.
Sungiusarnerup tamakkiisup nalaani nunatsinni sakkutooqarfik ataqatigiissaarisuuvoq, siullertullu Søværnets Operative Kommandomi (SOK) immamut akisussaasut attaveqarfigalugit ajutoornerullu annertussusianik paasissutissillugit.
SOK-imi immamut akisussaasut kingorna Danmarkimi suliarineqartussat ataqatigiissaarpai, uuliakoornerup akiornissaanut immikkut ilisimasalinnik pissarsiornermi kiisalu saliinermi atortussanik. Danmarkimi isumaqatigiissutigineqarpoq avatangiisinut tunngatillugu umiarsuaq Gunnar Thorson atortussanik nunatsinnukaassassanik assartuissasoq immikkut ilinniarsimasunik sulisoqarluni.