Silisip atuakkiaa Bogforumimi
Ivars Silisip Qeqertarsuarmi assilisaminik atuakkiaa Bogforumimi atuakkat nunatsinnut attuumassuteqartut akornanniissaaq
Novembarip 11-aniit 13-anut Københavnimi ukiumoortumik atuakkanik saqqummersitsineq Bogforum ingerlanneqassaaq, tallimanngornermiit sapaammut. Atuakkanik nuannarinnittut paradiisianni aamma atuakkiat qallunaatuut nunanillu allaneersut saqqummersinneqassapput.
Assiliisartoq atuakkirtorlu Ivars Silis aamma peqataassaaq atuakkiani "Disko - en blå bugt" saqqummersillugu, arfininngorpallu ualikkut sisamanut Tranescenemi Per Folkverimit oqaloqatigineqassalluni.
Silis atuakkiamini "Disko - en blå bugt" nunap immikkoortua taanna alutornarluinnartoq nutaaliatut takutinniarpaa. Allaaserisani assitalinni 15-ini Ivars Silisip silap pissusaa, uumasut inuillu takutinniarpai, ukiuni tusindilikkaani inuiaasarsimasunut nerisaqarfittut atuussimasoq.
Ivars Silisip saniatigut pania Bolatta Silis Høegh Bogfroumimi peqataassaaq meeqqanut atuakkiani "Aima" saqqummersillugu, aamma Hans Jakob Helmsip atuakkiani saqqummersissavaa taaguuteqartoq "Hvis du fløjter efter nordlyset" (Arsarnerit uinngiarfigigukkit).