Villy Søvndalip Issittoq pingaartippaa
Sara Olsvig aamma udenrigsminister Villy Søvndal Kalaallit Nunaat aamma Issittoq oqaloqatigiissutigaat
Udenrigsministeritut nutaatut Villy Søvndalip kissaatigaa atlantikup avannaanit ilaasortat saamerliit, siuliminut naleqqiullugit qanimut suleqatigineruniarpai.
Tallimanngormat Sara Olsvig aappassaanik udenrigsministeriami ataatsimeeqatigaa. Tamatumuuna nalinginnaasumik ilisimatitsiniarluni naalakkersuisunngortut nutaat nunanut allanut politikkiat nunat atlantikup avannaaniittunut aamma issittumut politikki nutaaq pillugu.
Ullormi oqaluuserineqartut pingasunik qulequtaqarput: Kongeqarfimmi Issittumi iliuuserisassaq, nunat avannarliit suleqatigiinnerat aamma CIA'p timmisartuussisarsimaneri nutaamik misissuiffigineqarnissaanik aalajangerneq.
- Udenrigsministerip pingaartillugu eqqaavaa danskit naalakkersuisunngortitaasa atlantikup avannaanit qinikkat saamerliusut qanimut suleqatiginissaanik aalajangerneq, nuannaarutigaa Kalaallit Nunaannit aamma Savalimmiunit folketingimut ilaasortanngortugut inissisimaneq nutaaq atorluarlugu ministerinik assigiinngitsunik uagut pingaartuusorisagut pillugit ataatsimeqqateqarsinnaanerput, Sara Olsvig allappoq.
- Nuannaarutigisorujussuuvara udenrigsministerip piffissaqarfigimmatigut. Issittumi iliuusissap aallartinnissaa pillugu apeqquteqarsinnaavunga, sammisallu allat pillugit Nunat Avannarliit Siunnersuisooqatigiiffiata ataatsimeeqqammisup sammisaannut tunngasunik, soorlu nunat issittumiittut pillugit nunat avannarliit aalajangiussaat Search and Rescue aallartisarnissaannut tunngasut. Taakkua saniatigut CIA pillugu misissuisitsinissaq paasisaqarfigineruarput, Sara Olsvig ilisimatitsivoq.
Aamma naalakkersuisunngortut Issittumik isiginiarnerusut sunik naatsorsuuteqarfigisinnaanerlugit oqaluuseraarput aammalu Issittoq pillugu nalunaarusiaq qaammatip naanerani saqqummiunneqartussaasoq pillugu.
- Udenrigsministeri nalunaarpoq ilisimatitseqatigiilluni ataatsimiittarnissaq ingerlaavartuussasut aammalu atorluarnissaat uanga ilimagaara. Udenrigsministerimik oqaloqateqarnera pissarsivigilluarpara, Danmarkip Issittoq pillugu isiginninniarnerunissaa paasisaqarfigigakkut aammalu suliassaqarfiit tassunga tunngasut allat, Sara Olsvig oqarpoq.