Naalakkersuisoq Odensemi tikeraaq
Kalaallit Illuutaat Odensemi inunnik ulikkaarpoq Ilinniartitaanermut, Ilisimatusarnermut aamma Nunat Avannarliit suleqatigiinnerannut Naalakkersuisoq Palle Christiansen, alakkaammat
Café Allu - sisamanngornerit tamaasa Kalaallit Illuutaanni Odensemi ingerlanneqartartoq - sisamanngorneq novembarip pingajuanni Palle Christiansenimit, Nunat Avannarliit ataatsimiinneranni Danmarkimiittumik alakkarneqarpoq. Pulaartoqarnernut atatillugu ministerimik kaffisoqateqarnissaq aaqqissuunneqarpoq, kikkulluunniit ministerimik kaffisoqateqarnissaminnut kajumissusillit apeqquteqarusuttullu periarfissaqartikkumallugit taamaaliorusuttullu amerlaqaat.
Inuusuttut utoqaqaanerillu Palle Christiansenimik naapitserusuttut aggiapput apeqqutissarpassuaqarpullu. Ilaatigut eqqartorneqarput CIA'p nunarput aqqusaarlugu timmisartuussisarsimaneragaanera, uulia, aatsitassanik piiaaneq ilinniartut atugaasa allanngortinneqarneri allarpassuillu.
Odensemi kalaallit ilinniartut
Palle Christiansenip aamma kalaallit ilinniartut peqatigiiffiata Avalaap sinniisui naapippai - Maliina Lyberth aamma Henrik Frederiksen - Kalaallit Illuutaanni ilinniarnermut siunnersortit Marianne B. Jensen aamma Mette Lund, kalaallit ilinniartut Odensemi Danmarkillu kujataani periarfissarpassui oqaluttuaralugit.
Kalaallit Illuutaanni allanngoriartorneq
Soorunami Kalaallit Illuutaat takornariarneqarpoq, illu ukiuni 30'ni Hunderupvejimi Odensip umiarsualivianiittoq maanna allanngortiteriffigineqarpoq, ukiuni tulliuttuni allineqassalluni Nunat Avannarliit Illuattut Odensip umiarsualiviani atuutilissalluni. Illu Kalaallit Illuisa suliaannut amerlasoorpassuarnut tattorliuffiuvoq.
Kalaallit Illuutaanni pisortaq Kirsten Mærsk suliassap tullia oqaluttuaraa Illullu suliai tamatigoortut eqqartorlugit, Palle Christiansen Odensip umiarsualiviani sanaartorfissamik takutinneqarpoq, tassani Nunat Avannarliit illuat sananeqassaaq.
Illoqarfimmi kulturikkullu suliniutilimmik pulaarneq
Kalaallit Illuutaannik pulaarnermi saniatigut Palle Christiansen, Nunat Avannarliit Illuata siulittaasua aamma Odense Slotimi Rådmandskontorimi by-og kultur rådmandinngortoq Steen Møller orninneqarpoq.
Palle Christiansen aamma Steen Møller siornatigut naapinnikuupput, Steen Møller aamma Kirsten Mærsk septembari qaammat Nuummiimmata Nunat Avannarliit Illuat ilisimatitsissutigiartorlugu.