Ilulissani Nuummilu katersuiniarneq
Meeqqat inuunerissut katersuiniarluni aliikkusersuinissarsuarmut billitsinik tuniniaaneq aallartippaat qulequtalik "Katersuiniarneq 2011" - Kinguaassiutinik atornerluisarneq unitsilli
Kalaallit nipilersoqatigiit arfinillit saqqummiisisartussallu pingasut Malik H. Olsen, Kristine Thomsen aamma Mudi Kramer Berthelsen eqeersimaarluarlutik novembarip tallimaanni katersuiniarnissami ingerlatsissapput. Aliikkusersuinissaq "Meeqqat Inuunerissut - Bedre Børneliv" (MIBB) piffissaq kingullerpiaq allanngortittariaqarsimasaat.
- Ajuusaarutigaarput Katersuiniarneq 2011 peqataaffiginissaanut periarfissaqannginnatta. Fallulah'ip qilanaarisimagaluarpaa Kalaallit Nunaannukarnissani siunertamilli pitsaasumik tapersersuinissi. MIBB iluatsitsilluarnissaanik kissaapparput neriullutalu Kalaallit Nunaannit aliikkusersuineq tapersersorluarneqassasoq. Neriuppugut allamik periarfissaqalerumaartugut Kalaallit Nunaat tikinnissatsinnut.Malte Erbs, Fallulah'ip agentia oqarpoq.
Fallulah'ip paarlatsissaattut MIBB nipilersortartunik allanik kalaallinit kingoqqisunik nipilersortussarsivoq - The Benefits, Ilannguaq Lumholt erinarsortullit.
- The Benefits Nuummut tikitsissinnaagatsigu nuannaarutigisorujussuuarput aamma tulluussimaarutigeqaarput eqqumiitsuliortut pikkorissut peqataasorissagatsigit, tamarmik Kalaallit Nunaannut attuumassuteqartut, Line Frederiksen, MIBB siulittaasoq oqarpoq.
Nuannersunik nipilersortoqassaaq, eqqarsarnartunik ilanngutassisoqartarluni aamma aningaasanik katersineq eqqissisimaarluni aliikkusersuinerussaaq.
Nuannaarutigisorujussuuarput Kalaallit Nunaanni peqataarusuttut tamaasa suliniummut ajunngitsumik siunertalimmut ilaatissinnaagatsigit, pissutigalugu suliffeqarfippassuit tapersersuimmata aamma TV'qarfiit MIBB tapersersorniarlugu aalajangersimammata. Allanngueqataarusukkuit taava ullumi billitsisigit, Line Frederiksen naggasiivoq.
Ilulissani billitsi 150 koruunilerlugu pisiarneqarsinnaavoq, illoqarfissuarmili soqutiginnittut Nuummi katersuiniarnissarsuarmut peqataanissaminnut 295 koruuniissapput.
Tamakkua saniatigut innuttaasut MIBB'p kinguaassiutitigut atornerluisarnerup pinaveersaarneqarnissaanut suliniutaa tapersersorsinnaavaat 1880'imut SMS'imik nassiussinikkut. 50 kr.-inik tapersiiniartoq allassaaq MIBB A, 100 kr.-inik tapersiiniartoq MIBB B, 150 kr.-inik tapersiiniartup allassavaa MIBB C.