Inuit tallimaagaangata ataaseq suliffissaaleqisuusarpoq

Naalakkersuisut inuit sulilersinnaanerat siunertaralugu immikkut ittumik aningaasaliipput, ilaatigut suliffissaaleqisunut siunertaqarluartunik pikkorissaanersut. Tamanna aasaq manna pivoq maannakkullu Aleqap pikkorissaanerit nalilertikkusuppai

Suliffissaaleqineq 20,4 procentinngorsimavoq. Assi: Sermitsiaq

§ 37 naapertorlugu naalakkersuisunut apeqquteqarnermini Aleqa Hammondip Siumumi siulittaasup piumasaraa suliffissaaleqisut pikkorissartinneqartut qanoq pisimanersut pillugu naliliisoqassasoq. Pikkorissarnerit sinerissami suliffissaaleqisunut tulluarsagaapput, aningaasalu aasaq manna aningaasaliissutaallutik.

- Nuna tamakkerlugu suliffissaaleqineq maannakkut 20,4 procentinngorsimavoq, tassungalu atatillugu naalakkersuisut suliffissaqartitsinermut qanoq politikkeqarnersut paaserusuppara. Aningaasaliissutit immikkut ittut aasaq manna sinerussami suliffissaaleqisut pikkorissartinneqarnissaannut aningaasaliissutigineqarput. Tassunga atatillugu paaserusuppara pikkorissartut taakku sulerinersut. Sulilersimappat taamaanngippallu sooq?

Aleqa Hammondip tunngavilersuutigaa maannakkorpiaq aalisarnerup iluani suliaqartoqanngitsoq, tunitsivinnilu sulisut angerlartinneqarlutik, sumiiffinnilu amerlanerni puisit amiinik tunisisoqarsinnaanani.

- Piffissami ilungersunartumi paaserusuppara Naalakkersuisut suliffissaqarnermut qanoq politikkeqarnersut, oqarpoq.

Powered by Labrador CMS