Toqutaasoq misissorneqartoq
Ataasinngornermi ullaakkut angut kalaaleq toqutaasoq 39'nik ukiulik misissorneqarpoq
Københavns Politi angutip 39'nik ukiullip arfininngorninngoraa Sydhavnimi toqutaasup aqqanik taasaqarusunngillat. Kisianni politikommissær Hans Erik Raben, Københavns Politi toqunermik immikkoortortaqarfiannit sermitsiaq.ag'mut uppernarsaavoq, toqutaasoq tassaasoq Bertel Kristensen, Danmarkimi najugalik.
Bertel Kristensen ataasinngornermi toqusunik misissuisartunit misissorneqarpoq Hans Erik Raben ilisimatitsivoq imigassartorsimanersoq ikiaroornartutorsimanersorlu ilaatigut paasiniarlugit.
- Toqutsinernik suliassani aamma taamaasiortarpugut. Misissugassatut tigusat paasiniarneqassapput. Kisianni toqutsinermut suna pissutaasimanersoq oqaatigisinnaanngilara, paasiartuaarparpulli. Toqutsineq misissuiffigineqarpoq sunali tunngaviunersoq oqaatigisinnaanagu. Kisianni uppernarsarsinnaavara toqutaasoq annersartissimasoq, isummitsarneqarluni tukkarlugulu toqunneqarluni, Hans Erik Raben oqarpoq.
Taassuma nangilluni oqaluttuaraa, 23'nik aamma 46'nik ukiulik, tamarmik novembarip 23'ata tungaanut tigummigallagassanngorlugit parnaarunneqartut. 23'nik ukiulik Københavnip immikkoortortaani kujasissumi najugaqavissoq, 46'nik ukiulik Københavnip kommuniani najugaqartoq.
45'nik ukiulik inissiami tamarmik isersimaffigisaanni toqutsiviusumilu attartortuusoq aqagu nal. 18.38'p tungaanut tigummineqarallarpoq.
- 45'nik ukiulik aqagu eqqartuussivimmi killisiorneqassaaq, kisianni tigummineqarallarluni parnaarussaanera suliareqqitassanngortissavarput, inunnik suli apersugaqaratta.