Nunatta Isiginnaartitsisarfia isiginnaartitsisarfimmik piumavoq
Kalaallit Nunaata Isiginnaartitsisarfiani siulersuisut aalajangerput isiginnaartitsisarfimmik sananissamut ataatsimiisitaliamik pilersitsisoqartariaqartoq
- Nunatta Isiginnaartitsivia inissaaleqivoq tamannalu sukkanerpaaq atorlugu aaqqinneqartariaqarpoq.
Taama oqarpoq Kalallit Nunaanni Isiginnaartitsisarfiup siulersuisuni siulittaasoq, Juaaka Lyberth.
- Maannakkorpiaq inissamik amigaateqarneq utaqqiisaasumik attartornerinnakkut iluarsiiffigineqartarpoq. Maannangaaq ukiunut arlalinnut sioqqutsisumik eqqarsalertariaqarpugut, piffissami ungasippallaanngitsumi nunatta isiginnaartitsisarfeqalernissaanik pilersaarutit piviusunngussappata.
Kalaallit Nunaata Isiginnaartitsivianik inatsit januaarip aallaqqaataa 2011 atuutsinneqalermat, isiginnaartitsisarfiup nutaap Silamiut inaat Nuummi radiohusitoqqami H. J. Rinkip aqqutaaniittut iserterfigiinnarpai.
2011'mut aningaasaliinermi aamma ilanngunneqarpoq Nunatta Isiginnaartitsiviani sulisut arfineq-pingasuniit qulingiluanut ukiup ingerlanerani ilaneqarnissaat, tamatuma saniatigut aallartisarneqassaaq isiginnaartitsisartussanik ilinniarfik tallimanik ilinniartoqartussaq. Pisariaqartitanut tamakkununnga radiohusitoqqami inissat aallaqqaammulli mikivallaareerput.
Aasap ingerlanerani uppernarsineqarpoq radiohusitoqaq oqoqartoq, tamatumalu kingorna Inerisaavimmik piginnittup illorsuarmik attartornermik isumaqatigiissut ukioq massuma naanissaanut atorunnaarsillugu.
Nunatta Isiginnaartitsivia juunimili angerlarsimaffeqanngilaq. Isiginnaagassianik nutaanik pilersitsinerit ininik attartorluni ingerlanneqarpoq, allaffissornermi suliassat angerlarsimaffinniit ingerlanneqarluni.
Init ajorluinnartut
- Nunatta Isiginnaartitsiviata inissaaleqinera ajorluinnarpoq. Sulisut taama atugaqartitaasariaqanngillat naak, isiginnaartitsisartut atugarliulunneq takornartarinngikkaluaraat naammagittartuullutillu taama atugassaqartinneqartariaqanngillat. Inissamik amigaateqarnerup nassataanik Isiginnaartitsinermik Ilinniarfik aggustimili aallartittussaagaluaq aappaagu aallartittussanngorlugu kinguartinneqarpoq, Juaaka Lyberth nassuiaavoq.
- Ulluinnarni aqutsisut siulersuisut peqatigalugit illoqarfimmi periarfissanik assigiinngitsunik misissuipput, isiginnaagassianik pilersitsiniarnermini, allaffissornermi, isiginnaartitsinermik ilinniarfimmut isiginnaartitsisarfimmilu anginngitsumut naleqquttussarsiorlutik.
- Piffissaq ingerlavoq. Allanngortiterinerit akisuut ingerlatereerlugit ininik attartornerni akigititaasut atorlugit inissaagallartunik nassaarsinnaagunarpugut, tamakkuli pisortat inaataannit akisuneroqaat. Taamaakkaluarli utaqqiisaasumik atorneqarsinnaapput. Naammanngillalli, Juaaka Lyberth oqarpoq.