Akissarsiat juullimi tunniunneqarnissaannik atsiornernik katersuiniarneq

Juulliaraq pisarnermisut ittuussaaq. Ileqqut attanneqassapput ukiumilu ulloq ataaseq taanna amigaateqartoqassanngilaq. Ukioq manna decembarimi akissarsiassat qaammammi ulluinnarmi kingullermi tunniunneqarnissaannut kikkut tamarmik akerliupput.

Ilaatigut SIK-p siulittaasuanit, siusinnerusukkut oqarsimasumit:

- Piffissami matumani sinerissami ilaasortatsinnit amerlasuunit saaffigineqartarpunga paasinnissinnaanngitsunik, sooq ukioq manna decembarimi akissarsiat pisarnertut juulli sioqqullugu tunniunneqassannginnersut, Jess G. Berthelsen tusagassiorfinnut nalunaarummi allappoq, tamannalu pissutigalugu naalakkersuisut kajumissaarpai ukioq manna akissarsiortut juulliaraq sioqqullugu akissarsiassaminnik tigusisinnaannginnerannik aalajangernertik allanngorteqqullugu.

Ilimanartoqarporli naalakkersuisut tunniutiinnassanngitsut. Taamaattumik maanna internettikkut akerliuniartoqalerpoq, tassani akissarsiat pisarnertut juulli sioqqullugu tunniunneqarnissaat pillugu atsiornernik katersuiniartoqarluni. Manna tikillugu 657-it atsiorsimapput.

Site-mi allassimavoq:

"Akissarsiat tunniunneqarnissaasa qaammatip naalerneranut kinguartinneqarnissaannik politikerit aalajangernerannut akerlioqataasinnaavutit atsiornikkut.
Atsiornernik katersuiniarnitsinni anguniarparput qaammammusiallit akunnermusiallillu akissarsiaasa juulli sioqqutilaarlugu tunniunneqartarnerisa attatiinnarneqarnissaa. Akissarsiat aatsaat decembarip 30-ianni tunniunneqarnissaannik kinguartitsineq akerleraarput.
Tassa pingaartumik meeqqat, utoqqalinersiallit akissaatikitsullu kiisalu allat sumiginnarneqarmata.
Nerisassat nioqqutissallu akisoqaat, naammaginartumillu juullisiorusukkaanni tamanna aamma akeqarpoq.
Taamaattumik qinnuigaatsigit ileqqoq malillugu akissarsiat juullip siuninngua tunniunneqarnissaanut tapersersuillutit atsioqqullutit, qujanaq."

Linki nassaarisinnaavat uani