Anda, ukiorsiuserlutit
Assakaasunik ukiorsiutilinnik atuinissamik malittarisassat silamut naleqquttuaannanngillat
Maajip aallaqqaataanit septembarip 30-at ilanngullugu biilertartut assakaasut ukiorsiutit atorlugit ingerlaaqqusaanngillat, taama nalunaarut nr. 141, 27. marts 1979'imeersumi allassimavoq - Kalaallit Nunaanni biilit atortuinut danskit angallannermik ministeriannit aalajangiussami.
Ajornartorsiulli uaniippoq sila nalunaarutinik malinninneq ajormat. Ukioq manna sumiiffinni arlalinni upernaaq nilleqaaq maaji aallarteriikatattoq aatsaat aput aalluni, ilami allaat sumiiffiit ilaanni aatsaat juunimi. Oktobarip tallimaat Nuummi nuna tassanngaannaq qaqortuinnanngorpoq, biilertartullu quasassiorlutik ajutuutallattarput.
Demokraatinit Anda Uldum siunnersuuteqarpoq, Kalaallit Nunaanni politimesteri pisinnaatitsissummik peqalissasoq, taamaasilluni assakaasut ukiorsiutit atornissaannik sivitsuisinnaassalluni - Kalaallit Nunaanni upernarumaataartoqartillugu immikkut akuersissuteqarnikkut, imaluunniit illoqarfinni ataasiakkaani aqqusinerni angallannermi pisariaqartinneqarsorineqarpat.
Anda Uldum tunngavilersuivoq: - Oqaannarsinnaavugut malittarisassat atuuttut sila tunngavigalugu pissutsinut pissusiviusunut naleqqutinngimmata, tamatumalu kingunerisaanik innuttaasut inatsisinik malinnikkusukkaluartut, piffissallu ukiorsiutinik assakaasoqarfissap nalaani tamakkuninnga atuisut, aqqusinikkut angallannermi sillimaniarnermi ulorianartorsiortitsisartut - tamanna upernaakkut quasatsillugu aqqusinerni ajutoornernik kinguneqartitsisartut takusareerparput.
Soorunami arlaannik siunertaqarluni taama oqartoqarpoq: Assakaasut ukiorsiutillit aqquserngit asfaltilersugaanerinik assorsuaq aserfallatsitsisarput, assakaasullu taamaattut biiliutillit orsussamut atortagaannik allisaasarput aammalu CO2'mik aniatitsinermut kingunipiloqartarluni.
- Assakaasut ukiorsiutitallit atorsinnaaneri sivitsorneqarpata ajornartorsiut anigorneqarnavianngilaq, illuatungaani politimesteri periarfissaqartariaqarpoq piffissamik sivitsuinissaminut, tassa assakaasut ukiorsiutit atorlugit biilertoqarsinnaalluni, Anda Uldum oqarpoq.
Immikkut ittumik periarfissiisoqarsinnaanissaa peqqussutit atuuttut iluanni periarfissaqanngilaq, taamaattumik Anda Uldum naapertorlugu naalakkersuisut naalagaaffeqartigiinnermi oqartussaasunut attaveqartariaqarput, assakaasut ukiorsiutit atornissaanik sivitsuisinnaanermik peqqussutip iluani periarfissaqalernissaq anguniaqqullugu