Akileraaruserinermi putoq Maliinap matuvaa

Inuiaqatigiinnik nakkutilliisutut Ombudsmandip nakkutigisarpaa namminersorlutik oqartussat kommunillu ingerlatsinerat inatsisit atuuttut ingerlatsinermilu ileqqoq pitsaasoq atorlugit pinersoq.

Ombudsmandi suliassami tamatumunnga attuumassutilimmi inerniliisimavoq Akileraarutinut Aqutsisoqarfik piginnaatitaanngitsoq innuttaasup akitsuutinut akiligassaasa akileraarutaavallaartunit, kommunimut akileraarutinut tunngasunit, ilanngaatiginissaanut, tassa akiligassap tamannartaa kommunip pisassarimmagu.

Tamatumunnga naalakkersuisut imaluunniit Kammeradvokati isumaqataanngillat.

Aningaasaqarnermut naalakkersuisoq Maliina Abelsen, Inuit Ataqatigiit, tunngavilersuivoq: - Akileraarutinut Aqutsisoqarfik akileraarusiisarpoq, Akileraarutinullu Aqutsisoqarfiup innuttaasunut tunngatillugu akisussaaffigai akileraarutit naatsorsornissaat, akiligassat akilersinniarnissaat akileraarutaavallaartullu tunniunneqarnissaat. Taamaattumik Akileraarutinut Aqutsisoqarfiup kommuninut akileraarutit tunniunneqarallarnissaat tunniunneqavinnissaallu akisussaaffigaa.

Maliina Abelsenip marlunngorpat ualikkut inatsisartuni aalajangiiffigipallatassatut saqqummiutissavaa akileraarutit ingerlanneqarnerannut inatsisip allannguutissaatut siunnersuut. Siunnersuutikkut siunertarineqarpoq Akileraarutinut Aqutsisoqarfiup akileraarutaavallaartunit akiligassanut ilanngaasinnaanerata ersarinnerulernissaa, naalakkersuisullu malillugit tamanna tunngaveqarpoq "Inatsisartut Ombudsmandiata suliami attuumassutilimmi oqaaseqaataatigut inatsisitigut inissisimanerup qularnartoqarnera".

Allannguutissatut siunnersuut kingusinaartumik nalunaarutigineqarsimavoq: - Kingusinaartumik nalunaarutiginninnermut tunuliaqutaavoq ajornartorsiut qitiusumik ajornartorsiutaammat, akileraarutaavallaarsimasunit akiligassanut ilanngaasarnermut atatillugu intsisitigut qularnartoqartitsineq, innuttaasut oqartussaasullu eqqarsaatigalugit, naalakkersuisut isumaqarlutik tamanna piaarnerpaamik qaangerneqartariaqartoq, Maliina Abelsen oqarpoq.

Inatsisip allannguutissani ersarissumik allassimavoq "akileraarutaavallaarsimasut tunniutinnginneranni taakkunannga ilanngaatigineqassapput makkununnga akiligassaasinnaasut: 1) aningaasarsianit akileraarutinut, 2) akitsuutinut, namminersorlutik oqartussat pisassaannuyt, 3) aningaasarsianit akileraarutinut atatillugu ilassutinut, ernianut akiliutissanullu il.il.aamma 4) akiligassanut allanut namminersorlutik oqartussanut nakkartussaanut.

- Akileraarutinut Aqutsisoqarfik akileraarutaavallaarsimasut tunniunneqarnerannut atatilugu ukiut tamaasa akiligassanut ilanngaateqartarpoq. Ilanngaatinut tamakkununnga qularuteqalersimaneq tamanna pitsaanngeqaaq. Innuttaasut imaluunniit Akileraarutinut Aqutsisoqarfiup atorsinnaanngilaat sammisaqarfimmi taama pingaaruteqartigisumi inatsisitigut inissisimanerup suli qularnartoqarnera, Maliina Abelsen oqarpoq.