Kina aatsitassanik tuniniaanini unitsikkaa
Nunap sananeqaataanik qaqutigoortunik tuniniaanermi akit appasipput. Akit qaffassarniarlugit Kina nunanut allanut tuniniaanerminik qaammat ataaseq unitsitsivoq
Piffissaq kingulleq Kinamit aatsitassarsiornerup iluani nunap sananeqaataanik akigititat appariartuinnarput. Taamaattumik Kina nunanut allanut tamakkuninnga tuniniaanerminik unitsitsigallarpoq akit qaffaqqinnissaat anguniarlugu. Juunimili akit pingajorarterummik apparput. Taama allappoq Associated Press (AP), ilanngullugu paasissutissiissutigalugu neodymiumoxid akia juunimili 34 procentimik appariartoq killumut 157 dollarseqalerluni. Europiumoxid'ip akia 35 procentimik apparpoq kiilumut 2.904 dollarseqalerluni. AP kisitsisaatai Lynas Corp.'iminngaanneerput tassaasoq australiami nunap sananeqaataanik qaqutigoortunik tunisassiortoq.
Paasissutissat Ingeniøren'iminngaanniit pissarsiaapput.
Kina tunisassiornermik kisermaassisuuvoq taamaattoq Kalaallit Nunaat, USA, Canada aamma Australia aatsitassanik qaqutigoortunik piiaaqqilernissaminnik pilersaaruteqarput