MIK Naalakkersuisunut ilaasortamik ilaasortalik

Kalaallit Illuutaat Københavnimiittoq sapaammi Nunat Avannarliit Siunnersuisoqatigiivini ilaasortamik kaffisoqateqarnissamut periarfissiivoq

Kalaallit Illuutaat sapaammi kaffillerpoq Nunani Avannarlerni Siunnersuisoqatigiinnut ilaasortat peqataaffigissavaat apeqquteqarfigineqarsinnaallutik. Assi: Sermitsiaq

Novembarip aallaqqaataanit pingajuat ilanngullugu Nunat Avannarliit Siunnersuisoqatigiivi Københavnimi ataatsimiissapput, kalaallit Nunani Avannarlermi Siunnersuisoqatigiivini ilaasortat aamma Naalakkersuisunut ilaasortat Nunani Avannarlerni Ministerit siunnersuisoqatigiivini ilaasortaasut, soqutiginnittunit kikkunnillunniit sapaammi oktobarip 30'anni nal. 15.00 Københavnimi Kalaallit Illuutaanni apeqqarissaarfigineqarnissaannut qaaqqusisoqarpoq.

Kalaallit naalakkersuinermik suliallit 1984'imiit Nunat Avannarliit Siunnersuisoqatigiivini issiapput, ilaasortat allat 85'it peqatigalugit nunani avannarlerni politikkikkut suleqatigiinnermi oqaasissaqaqataallutik. Nunani Avannarlerni Siunnersuisoqatigiit siunnersuuteqartarput aammalu politikkikkut oqaaseqaasiortarlutik nunani avannarlerni naalakkersuisunut ilaatigut Kalaallit Nunaanni, Savalimmiuni aammalu Ålandimiittunut. Ukiumut ataasiarluni ataatsimiinnermi Nunani Avannarlerni nunat naalakkersuisuisa akisussaasui "soraarummeertarput" - Nunat Avannarliit Siunnersuisoqatigiivisa kissaataattut politikkimik ingerlatsisimanersut paasiniarlugu.

Naalakkersuisunut ilaasortat ukiup ingerlanerani Nunat Avannarliit Ministeriisa suleqatigiinneranni peqataasarput aamma tassaasoq naalakkersuinermik ingerlatsisut suleqatigiiffiat. Ministerit ataatsimiittartoqatigiit assigiinngitsut aamma ministerit suleqatigiit quliupput suleqatigiinnissamik akisussaaffimmik tigumminnittut. Naalakkersuisut siulittaasuat Kuupik Kleist naalakkersuisut ataatsimiinneranni peqataassaaq.

Oktobarip 30'anni ataatimiinnermi Naalakkersuisunut Inatsisartunilu ilaasortat nunani avannarlerni suleqatigiinnermi suliaminnik eqqartuissapput pingaartumik avannarlerni politikkereqatiminnut suut suleqatigiissutigissallugit.

Taama nalunaarpoq sumut.dk

Powered by Labrador CMS