Aalisartukkormiut isertitaqanngillat
Atassut qaleralittassiissutinik qaffaaqqusillutik naalakkersuisunik kaammattuippu
Atassutip inatsisartunut ilaasortaatitai Siverth K. Heilmann aamma Knud Kristiansen, Avannaani aqutsiveqarfiit pingasut qaleralittassaasa amerlineqarnissaannik naalakkersuisunut ilungersorlutik kaammattuuteqarput, taavani ilaqutariit ukiup sinnerani inuussutissaqarniassammata. Aalisagartassaqannginnerup kommuni ilungersortissavaa, taakku isumaqarput.
Atassutip paasissutissaatai naapertorlugit avannaani aqutsiveqarfinni qaleralittassat nungussimanngikkuni piffissap sivikitsunnguup iluani qaqinneqareersimassapput, politikkerit illuatungiliuttut marluk oqarput.
Uummannap aqutsiviani qaleralittassat qallorneqareerput, Ilulissani ukiup naanissaanut pisassat 400 tonsiupput, Upernaviullu aqutsiviani qaleralittassat sinneruttut 600 tonsiullutik.
Tamakku tunngavigalugit Knud Kristiansen aamma Siverth K. Heilmann ajorartorsiutaasinnaasunik siumungaaq pinaveersaartitsiniarput.
- Pisassiissutit nungunnerisigut ajornartorsiutit kingunerisassai, siullertut aalisartut, pilersuisuusut aningaasarsiorsinnaajunnaassapput, ilaquttamillu pisariaqartitaannik pilersuisinnaajunnaarlutik, taamaasillutillu aalisartut pisortat ikiorsiissutissaat ukiup sinneranut kisiat isumalluutigisariaqalissavaat. Tamanna Qaasuitsup Kommuunianut annertuumik ajornartorsiortitsissaaq, ilisimavarpummi Qaasuitsup Kommuuniata aningaasaqarnera ilungersunareersoq.
- Aappaattut qaleralittassiissutit nungunnerisigut tunisassiorfinni sulisut angerlartitaassapput, taamaasillutillu aamma ukiup sinneranut pisortat ikiorsissutaat kisiisa isumalluutigilersussaallugit, Knud Kristiansen aamma Siverth K. Heilmann naalakkersuisunut saaffiginnissutiminni allapput.
Atassummit isumaqartoqarpoq piffissaanngitsoq januarimut pisasseeqqinnissaq utaqqissallugu.
- Ajornartorsiullu piffissaatillugu iliuuseqarfigineqartariaqartoq, Knud Kristiansen aamma Siverth K. Heilmann allapput.
- Atassummiillu innersuussutigissavagut, Uummannap aqutsiveqarfiani qaleralittassiissutit 1000 tonsinik ilaneqassasut, Ilulissat aqutsiveqarfiani 800 tonsinik ilaneqassasut, kiisalu Upernaviup aqutsiveqarfiani 400 tonsinik ilaneqassasut, Knud Kristiansen aamma Siverth K. Heilmann allapput.