Ujaasineq taamaatinneqarpoq
16'inik ukiulimmik Akamali Josefsenimik ujaasineq taamaatinneqarpoq ajunaarsimanissaa naatsorsuutigineqarmat
Politiassistent Niels Tønnessen, Maniitsoq ilisimatitsivoq 16'inik ukiulimmik Akamali Josefsenimik ujaasineq taamaatinneqartoq.
- Suli uumaannarnissaa naatsorsuutigiunnaarparput ipisimanissaalu naatsorsuutigilerlutigu, Niels Tønnesen oqarpoq.
16'inik ukiulik kingullermik Brugsen Maniitsup silataani marlunngorneq 18. oktober nal. 23 miss. takuneqarpoq.
Ulloq taanna 16'inik ukiulimmik Akamali Josefsenimik ujaasineq aallartimmat pingasunngornermi oktobarip 19'iat, piniartup ullaakkut qajariaa Maniitsumi ikuallaaviup avataani Ungusiviup eqqaani naammattoorpaa.
- Piniartoq isumaqarsimavoq qajariaq qilerussaarluni saavissimasoq taamaattumillu sissamut inaalissimallugu ajortumik pisoqarsimasinnaanera eqqarsaatigeqqaarnagu. Aatsaalli nukappissamik ujaasineq tusarliunneqarmat politiinut qalerriutigisimallugu qajariaq puseqqasoq naammattoorsimallugu, Maniitsumi politeeq Niels Tønnesen oqaluttuarpoq.
Tamanna tunngavigalugu ujaarisap ipisimanissaa politiinit naatsorsuutigineqalerpoq.
Niels Tønnesen oqarpoq ilaqutaasut pisoq alianartoq pillugu nalunaarfigineqareersut.