NÛK tupaallatsitsingajattoq
Unammiuaarnerup immikkoortuani siullermi unamminerit kingulliit pitsanngoriartornermik ersersitsipput - arfininngornermi semifinalit ingerlanneqassapput
Arnat assammik arsarlutik Faxe Kondi Cup'iat unammisut ullormiit ullormut pitsanngoriartorput. Tallimanngornermi anngunniulluni unamminerit kingulliit ingerlanneqarmata GSS'ip Illoqarfimmiut 31-24'mik ajugaaffigaat, FH NÛK'mut 30-28'mik ajugaavoq.
GSS'ip Illoqarfimmiunut unamminermini naatsorsuutigisaminnit ilungersornerugunarput. Isertitassatik tamaasa ilungersuutigaat - nikinnermilu GSS taamaallaat 14-12'imik siuaqqavoq. Unamminerup immikkoortuata aappaani Illoqarfimmiut nukilaannerupput GSS'illu siuanerujartorluni. Unammineq naammassimmat GSS 31-24'mik ajugaavoq.
Linda Lyberth illoqarfimmiut sinnerlugit arfinilinnik isertitsivoq, Kathrine Mikkelsen aamma Christina Lange tamarmik tallimaraartut. Lykke Frank Hansen arsarluaqaaq qulingiluanik isertitsilluni. Holdit taakku marluk GSS aamma Illoqarfimmiut arfininngornermi semifinalini naapissapput nal. 17.15 unammineq aallartippat.
NÛK'p FH ilungersortippaa
FH NÛK'mut unamminissaannut ajugaasangatinneqareerput. NÛK unamminerni siullerni marlunni ajorsarnikoq islandimiunut ajornartorsiutaassangatinneqanngilaq. NÛK'lli periarfissaqarnissi tamaat akiuuppoq, taamaasillunilu nikinnermi 11-15'iinarnik kinguaqqalluni.
Unamminerup immikkoortuata aappaani soorlu suna tamarmi NÛK'mut ajornarunnaartoq. FH arsarnertik iluatsinneq ajuleraluarpaat pingaartumik måleriartarnitik. FH straffit tallimat isertinngitsoorpaat ajornartorsiuleraluarlutillu. NÛK unamminerup immikkoortua kingulleq 17-15'imik ajugaaffigaat naammassinermili FH 30-28'mik ajugaallutik. Unamminermili NÛK takutitsilluaqaaq.
NÛK'mi arsarluarnerpaajuvoq målimiittuat Paornannguaq Isaksen. Arsaqatigiit tamarmik arsarluaqaat - arsartut aqqanillit isertitsillutik. Laila Sivertsen amerlanerpaanik isertitsivoq arfinileraarami. Anita Ægrisdottir, FH arfineq-pingasunik isertitaqarpoq.
Holdit taakku arfininngornermi semifinalit ingerlanneqarpata nal. 15.00 naapeqqissapput. Unamminissarlu taanna pissanganarsisinnaavoq NÛK ajugaangajavereermat.
Inernerit kikkullu isertitsisimasut uani takukkit.