Nunatsinni inuusuttut angajoqqaat akisussaanissaat kissaatigaat
Kalaallit Nunaanni inuusuttuaqqat atuarfiit peqqinnarnersut angajoqqaallu akisussaaffeqarnerulernissaannik ujartuipput. Taakkua ullumi naggataarutaasumik oqaaseqaatertik Naalakkersuisunut ilaasortamut Mimi Karlsenimut tunniuppaat.
Naggataarutaasumik allakkiamiipput inuusuttut 39-t Ilulissani Nakuusa Youth Forumimi sapaatip akunnerani oqaluuseralugillu suliaanni innersuussutit. Ataatsimeersuarni namminersorlutik oqartussani UNICEF Danmarkimiillu aaqqissuunneqarpoq Perorsaasunngorniat Ilinniarfiat suleqatigalugu, aatsaallu siullermeertumik nunatsinni inuusuttut 13-it aamma 15-it akornanni ukioqartut taama amerlatigisut ataatsimoorlutik meeqqat inuusuttullu pisinnaatitaaffii atugaallu oqaluuseraat, tamanna ataatsimeersuarnermit tusagassiivinnut nalunaarummi atuarneqarsinnaavoq.
- ”Inuusuttut workshopini assigiinngitsuni sulipput takorluukkat imminullu tatigineq ilaatigut qulequtaralugit oqalillutik. Tamanna naggataarutaasumik allakkiamik inerneqarpoq, naalakkersuinermik sulialinnut tunniunneqartussamik”, taama oqarpoq UNICEF Danmarkimiit meeqqanut inuusuttunullu tunngasunut pisortaq Anne-Mette Friis.
Innersuussinerit ilaatigut tassaapput naalakkersuinermik suliallit sukkanerusumik qisuariartarnissaat atuarfinni atugassarititaasunik ajornartorsiuteqartillugu soorlu oqoqarnermut tunngatillugu. Aamma inuusuttut allapput kissaatitigitsik angajoqqaat meeqqaminnut pujortartartunut akisussaassuseqarnerunissaat. Tamannalu naalakkersuisut suleqataaffigisariaqarpaat.
Meeqqat toqqissisimanissaat pingaartuuvoq
15-inik ukiulik Juunaaraq Mikaelsen Nakuusa Youth Forum Ilulissani ingerlanneqarnerani naggataarutaasumik allakkiortut ilagaat
- ”Nunatsinnit tamarmit peqatit suleqatigalugit pissanganarsimaqaaq, neriuutigaaralu innersuussutivut naalakkersuinermik suliaqartunit piviusunngortinneqarumaartut. Uannut pingaartuuvoq meeqqat tamarmik angerlarsimaffimminni, atuarfimmi ilami peroriartornerminni toqqissisimanissaat”, taanna oqarpoq.
Inuusuttullu tusaaniarneqassapput, Susie Kjeldsen Ilaqutariinnermut, kultureqarnermut, ilageeqarnermut naligiissitaanermullu naalakkersuisoqarfimmik pisortap tullia oqarpoq.
”Nunatsinni meeqqat inuusuttullu pillugit suliassarpassuaqarpoq. Tamaasa suliarisinnaassagutsigik pineqartut akuutittariaqarpavut. Immikkuullarissuuvoq inuusuttut taama amerlatigisut Yoouth Forumimut katersorsinnaagatsigik, ataatsimuuginnanngillammi, kinguneqassaarli, oqariartuutaat atorneqarlutik. Meeqqat ullumikkut naalakkersuinikkut tusaaniarneqarput,” Susie Kjeldsen oqarpoq.
NAKUUSA Youth Forum MIPI'mit qanimut malinnaaffigineqarpoq - Meeqqat Inuusuttullu pillugit ilisimasanik katersiffik - ukiup naalernerani nalunaarusiussaaq meeqqat inuusuttullu anguniagaat isummiussaallu pillugit. Meeqqanut suliniuteqartussanik ataatsimiitartuliortoqassaaq, taakkua siunissami tusaaneqarnerulernissaannik suliniuteqassapput.
NAKUUSA pillugu
NAKUUSA Youth Forum ukiuni tallimani suliniutissap (NAKUUSA-mik taaguuteqartup) aallarniutigaa, Namminersorlutik Oqartussat UNICEF Danmarkillu suleqatigiillutik januaarip aallaqqaataani 2011-mi pilersitaat. Suleqatigiinnermi siunertaavoq nunatsinni meeqqat inuusuttulu pisinnaatitaaffiissa nukittorsarnissaat.
NAKUUSA Youth Forum Ilulissani Perorsaanermik Ilinniarfik suleqatigalugu aaqqissuunneqarsimavoq, ataatsimeersuarneq oktobarip 17-aniit 21-anut ingerlassalluni. Tamanna ilaatigut Bikubenfondenimit Dronning Margrethep Prins Henrik Fondimillu tapiiffigineqarpoq. Katillutik inuusuttut 149-t Youth Forumimi peqataanissaminnut qinnuteqarsimapput, tassalu kalaaliaqqat 13-it 15-illu akornanni ukioqartut 20-rarterutaat.