Nunanit allanit sulisut

Inatsisartunut ilaasortaq Malik Berthelsen, Siumut nunatsinni sanaartornerup iluani nunanit allanit suliartortartut qassiuneranik paasissutissanik pissarsiniarnermini ajornartorsiuteqarpoq. Taassumami paaserusuppaa sanaartornerup iluani sulisinnaasut nunatsinneersut qassit suliffissaaleqisuunersut, illuatungaatigut Kalaallit Nunaat sanaartornerup iluani sulialinnik nunanit allaneersunik eqqussuiitigisoq.

Naalakkersuisunut ammasumik allakkani Malik Berthelsenip apeqquserpaa Ove Karl Berthelsenip nunanit allanit suliartortartunik paasissutissiinera.

Inuussutissarsiornermut aatsitassarsiornermullu naalakkersuisoq Ove Karl Berthelsen oqarmat, inuit nunanit avannarlernit suliartorniat sulisinnaanermut akuersissummik qinnuteqaqqaartariaqanngitsut, peqqussut nr. 150, 23. februar 2001 nunanit allanit sulisussarsiortarneq naapertorlugu. Taanna aallaavigalugu Kalaallit Nunaanni suliartorniat immikkut akuersissuteqartariaqanngitsut (visum).

Malik Berthelsen, oqarpoq taanna apeqqutiginagu taannami peqqussut pissusissamik naapertuimmat.

- Kisianni Siumumiit paaserusupparput peqqussut nr. 27, 30. oktober 1992'imeersoq tassa nunanit allanit suliartorniat ikinnerpaaffimmiinnissaannik anguniagalik suliffeqarfinnit malinneqarnersoq, Malik Berthelsen oqarpoq.

- Taassuma peqqussutit qulakkiissavaa nunanit allanit suliartorniat ingalassimaarnissaat taamaasilluni qulakkeerneqassammat nunaqavissut suliffinnut periarfissaqarnissaat suliffissaqartinnissaallu, oqarpoq naqissuserlugu inatsit taanna kikkunnit tamanit malinneqartariaqartoq.

- § 2, erseqqissumik allassimavoq aammami § 3'mi - kikkut sulisinnaanermut akuersissummik qinnuteqaqqaartariaqanngitsut, naqissuserlugu inatsimmi § 3'mi allassimasoq, Kalaallit Nunaanni sanaartornermik suliallit tassaasut nunami inunngorsimasut aammalu inuunerminni ukiut siulliit tallimat nunatsinni najugaqarsimasut.

- Stk. 2 oqaasertaqarpoq, kikkulluunniit § 3'mik naammassinnissinnaanngitsut allaminngaanneersutut isigineqartariaqartut, Kalaallit Nunaannut arlaatigut attuumassuteqanngippata. § 4 innersuullugu.

- Tamanna isumaqarpoq sulisitsisoq kinaluunniit nunanit allanit sulisoqalernissaminik kissaatillip qulakkeeqqaartariaqaraat akuersissummik qinnutigisaq pigineqaqqaassasoq. Inatsit taanna sakkutooqarfinni kisimi atuutinngilaq, Malik Berthelsen oqarpoq.

Oqallinneq aallartippoq Malik Berthelsen arlaleriarluni apeqquteqarmat, sanaartornerup iluani sulisinnaasut qassit Kalaallit Nunaannut 2010 aamma 2011 ingerlanerani suliartorsimanersut. Ove Karl Berthelsen tassunga akissuteqarpoq, ukiumut tallimat missaat Danmarkimi nunanit allamiut sullinneqartarfiannut innersuuttarlugit. Ove Karl Berthelsenilli nalunaarutiginngilaa sanaartornerup iluani sulisinnaasut qassit pingaartumik Danmarkimit nunanilu avannarlernit ilaatigut Islandimit suliartortarnersut.

Ukiuni eqqartukkatsinni sanaartornerup iluani suliaqarsinnaasut nunanit avannarlerneersut arlallit sulisorineqartarput ilaatigut Nuummi centerissaliornermi aammalu Qinngutsinni atuarfittaami, Radiofjeldimi meeqqerivimmi, Narsami Inuilip allissutissaani. Suliffeqarfiit nunanit allaneersunik sulisullit assersuutigalugu tassaapput Monberg og Thomsen aamma Istak. Malik Berthelsenip paaserusutatuaraa suliffeqarfiit tamakkua peqqussummik nr. 27, 30. oktober 1992'imeersumik nunanit allanit suliartortussat ikinnerpaaffimminiitinneqarnissaannut attuumasoq malinninnersut.