Oqallisissiaq: Alloriarnerup tullia aallarteriiginnarsiuk!
Karl Lyberth, Siumut Mittarfeqarfiit namminersortunngorsarnissaat tapersersorpaa aammali Nukissiorfiit namminersortunngorsarnissaat kissaatigalugu
Mittarfeqarfiup aktieselskabitut ingerlatilernissaa Naalakkersuisunit anguniarneqartoq nalunaarutigineqaqqammerpoq. Mittarfeqarfiup aktieselskabinngortinnissaa Siumumit alloriarnertut pitsaasutut, nunatsinni ineriartornermut naleqquttutut isigaarput.
Siumumit isumaqarpugut tamanut pitsaanerpaajussasoq, aammalu nunatsinni ineriartornermut naleqqulluinnartuusoq ilanngullugu Nukiffiorfiit piaartumik aktieselskabinngortinneqarpat.
Mittarfeqarfiit aktieselskabinngortinneqarpat Nukissiorfiit tassaalissapput nunatsinni suliffeqarfik Namminersorlutik Oqartussat aningaasaqarnikkut aqutaasa (nettostyret) nunngutaat.
Taamaammat Siumumiit Naalakkersuisunut inassutigissavarput ilanngullugu Nukissiorfiit aktieselskabinngortinnissaannut suliaq aallartereeqqullugu ilaatigut makku tunngavigalugit:
Selskabini niueqatigiinnermut samminerulernissaq, kiisalu taakku allaffissornikkut qitiusumit nakkutigineqarneri naleqqussarneqarnerilu taamaatinniarlugit, tamakkununnga ilaallutik ingerlatat landskarsimit aningaasalersorneqartut suliffeqarfiillu ingerlataat aningaasarsiorfiusut avissaartinnissaat.
Niueqatigiinnermut sammineruneq suliffeqarfinnillu pisariillisaanerit nioqqutissat kiffartuussutillu akikinnerulernissaannut aqqutissiuussissasut atuisartunut suliffeqarfinnillu ingerlatsisunut iluaqutaasussat.
Akissarsiatigut atorfininnermilu atugassarititaasut iluanni annertunerusumik pituttorsimajunnaarsitsineq taamaaliornikkut inuit naleqquttunik piukkunnaatillit pilerisiulersikkumallugit.
Ukiumi pineqartumi aningaasanut inatsit toqqaannartumik artukkinngikkaluarlugu aningaasaliissutinik aningaasalersuinerup qimannissaa.