Faxe Kondi Cup naligeerrateqaat

Holdip toqqakkanik inuttallip NÛK unamminermi pissanganaqisumik naammassineqartumi ajugaaffigaa

GSS Islandimut sungiusariaqqammerpoq. Assi: Jørgen Chemnitz

Ukioq assammik arsarfiusoq aatsaat aallartilaarpoq. Taamaammat nuannaajallannarpoq Faxe Kondi Cup'ip nalliuttorsiorluni Nuummi unammiuaartitsinerani takullugit arnat qanoq sungiusarluartigisimasut. Unammiuaarnerup ulluata aappassaani unamminerit pissanganartut naligiiffiusullu ingerlanneqarput.

Unamminermi siullermi naligeeqaat illoqarfimmiut toqqakkat holdiat, Ilulissanit, Sisimiunit, aamma Danmarkimeersunik inuttallit NÛK'mut unammimmata. Illoqarfimmiut nikinnerani 13-12'imik siuaqqalaarput. NÛK'p Karen Marie Kyed Meyer amigaatigeqaat taanna suliffimmut atatillugu angalasup peqannginnera takuneqarsinnaalluni.

Unamminerup immikkoortuata aappaani holdit imminnut malittariiginnarput naligeeqalutik naggataagulli unammineq assut pissanganarsilluni. Dommerit nerrivianni isertitanik allattuinermi ajutoortoqarmat paatsiveerunneqarpoq NÛK ajugaasutut allassimaleriataarmat. Piffissaq sivisooq assortuuttoqareersoq - oqaaserpassuit aninneqareermata - kukkuneq iluarsineqarpoq. Illoqarfimmiut eqqortumik 26-25 ajugaatinneqarput.

Katrine Mikkelsen, Danmarkimi arsartartuusoq Illoqarfimmiut sinnerlugit arfinilinnik isertitsivoq. Christina Lange, Ilulissat tallimanik isertitsivoq. Arnajaraq Jørgensen aamma Ivalu Kleist, NÛK tamarmik tallimanik isertitaqarput. Nuna tamakkerlugu sungiusaasoq Jakob Andreasen Nuummut tikissimasoq Illoqarfimmiunik aqutsisuuvoq.

Finalernissaq tipisiorneqarpoq

Unammiuaarnerup ulluani siullermi holdit ajugaasut marluk GSS aamma FH Island imminnut naligeeqalutik unammipput. Unamminerup immikkoortuani siullermi malittariiginnarput unamminerulli naajartornerani holdi islandimeersoq siuariartorpoq nikinnerani 13-9'mik siuaqqallutik.

Unamminerup immikkoortuata aappaani GSS'ip ajorsangaatsiarnissaa ilimanarsigaluarpoq FH målinik arfineq-marlunnik siuaqqalermat. Unamminerulli naammassiartuaarnerani GSS sukappoq kinguangaatsiassutigigaluakkamillu ilaat annallugit - taamaasillutik 22-26'nnarmik ajorsarlutik. Ulluni tullerni tupinnartumik pisoqanngippat Faxe Kondi Cup'imi sapaammi finalernissaanni holdit taakkua naapinnissaat naatsorsuutigineqarpoq.

Steinunn Snorradóttir, FH amerlanerpaanik isertitsilluni arfineq-marloraarpoq, Panu P. Grønvold aamma Andrea Andreasen, GSS tamarmik tallimanik isertitsisut.

Tallimanngornermi unnukkut nal. 19.00 GSS'ip Illoqarfimmiut holdiat naapissavaa, NÛK aamma FH nal. 20.40 miss. unamminissaat aallartissaaq.

Ullumi islandimit tikeraat aningaasaliisut aaqqissuisullu ilagalugit Qooqqunut angalaassapput - silaanarissarluassapput unammiuaarnernut kingullernut nukissaqarluassallutik.

Powered by Labrador CMS