Jens B. nunatsinnilu pissutsit naligiinngitsut

Pingasunngornikkut apeqqarissaarneq Nuup nunattalu sinnerani pissutsit pillugit saqitsaanninngorsinnaavoq

Jens B. Frederiksen pingasunngornerup ullaap tungaa sapaatip akunnerani uani apeqqaarfigineqassaaq. Screenshot

Ineqarnermut, Attaveqarnermut Angallannermullu naalakkersuisoq Jens B. Frederiksen, Demokraatit ataasinngornermi Angallanneq pillugu isumasioqatigiit isumaliutissiissutaannik oqallinneq takisooq naammassilaaginnanngilaq, aamma tassa inatsisartut ataatsimiittarfiata oqaluttarfianut qaqeqqittariaqassaaq.

Kalaallit Nunaanni Sulisitsisut peqatigiiffiata Ilulissani immikkoortortaani siulittaasoq, qalipaasut ittuat Ingolf Skov Ineqarnermut, Attaveqarnermut Angallannermullu Pisortaqarfik assersuuppaa tuluit quujasaarusiaannut »Javel, hr. minister«, tassani atorfillit ministerinik ulapisitsipput killormuunngitsoq. Imalu torrallaatigisarput allaat ministerip naalagarsiortitaanini maluginerluunniit ajorlugu, Ingolf Skov sapaatip akunnerata siuliani Sermitsiamut oqallisissiamik allappoq, illut 24't suliarinnittussarsiuunneqarneranni periutsimik allanngortitsisoqarnerata kingorna.

Siumup siulittaasua Aleqa Hammondip oqaatigaa G-60'ip politikkia utertinneqarsimasoq, maannamut naalakkersuisooqatigiit nunatsinni inuiaqatigiit equngasorujussuarmik inissikkaat, ilami Nuup sanaartugassat tamaasa pissarsiarai, nunatta sinnerani sanaartornermik suliallit suliffissaleqisut.

Jens B. Frederiksen, Ukiaanerani ataatsimiinnermi arlaleriarluni »Kalaallit Nunaanni pissutsit naligiinngitsut« pillugit unnerluunneqartarpoq, nunatta sinnera neqitsiullugu Nuuk ajunngitsuliorfigineqartuarmat, isornartorsiuisut sanaartugassat inissisimaffiinik oqaatigisaat naalakkersuisup ilisarisinnaannginnerarpaa.

Illuatungaani aggustip 19'ianni nuannaanngaarluni Kommune Kujallermi borgmesterip Simon Simonsenip tusagassiivinnut nalunaarutaa atuarpaa, naalakkersuisut aningaasanut inatsisissatut siunnersuutaanni Kujataani 154-162 million koruuninut sanaartortoqarnissaanut aningaasaliiniarmata suliffissaqartitsinermut akileraarutinillu isertitassat iluaqqutaasussat pillugit.

- Kommune Kujallermit nuannaarutigeqisatsinnik kommunimi sanaartugassarpassuit inissinneqalersut pillugit nalunaarfigineqarput, Simon Simonsen nuannaaqisoq oqarpoq taassuma sanaartugassat taagorpai ilaatigut tassaasut atuartut najugaqarfiat, ilaqutariinnut illut aamma Nanortalimmi atuarfiup kigutilerisarfissaa, autistinut angerlarsimaffissaq, kollegia nutaaq, illoqarfinni illut, imermik sukuiaavik aammalu Qaqortumi utoqqaat illussaat.

Jens B. Frederiksenip paasisinnaanngilaa Siumup siulittaasuata sanaartugassat tamaasa Nuummi pinissaannik pasilliutaa, illuatungaani Siumup Kommune Kujallermi borgmesteriutitaata Kujataani sanaartugassarpassuit pillugit nersualaaraani.

Pingasunngorneq nal. 11 -12 Jens B. Frederiksen, apeqqutit »Kalaallit Nunaanni pissutsit naligiinngitsut« pillugit akinissaminut periarfissaqassaaq, apeqqarissaarfigineqarnermili nalaanni naalakkersuisut allat pisarnerattut atorfilittai tusarnaartut akornanni issiassapput piareersimallutik apeqqutit itisilerneqartariaqalerpata....

Powered by Labrador CMS