Angerlarsimaffiup avataanut inissitat nakkutiginerusariaqarput
Demokraatit: Inissiinikkut akisussaaffik unitsinneqarsinnaanngilaq
Demokraatit inatsisartunut ilaasortaatitaat Astrid Fleischer Rex meeqqat angerlarsimaffiit avataanut angajoqqaarsialerlugit inissinneqartartut nakkutigineqarnissaannut piumasaqaatit erseqqissaavigineqaqquai, tamatuma saniatigut meeqqanut taakkununnga iliuusissatut pilersaarutit suliarineqallaquai.
Inatsisartut upernaakkut ataatsimiinnerminni meeqqat angerlarsimaffiit avataanut angajoqqaarsialerlugit inissinneqartartut oqaluuserineqarmata, taakku pillugit pilersaarusiortoqartannginnera nakkutilliisoqannginneralu isornartorsiorneqarpoq.
- Ajoraluartumik suli angajoqqaarsianngortartut meeqqat qanoq iliuuseqarfigineqarnissaannut pilersaarusiorfigineqarsimanngitsunik paarisaqalersarput, aamma suli nakkutilliineq annikippallaarpoq, Astrid Fleicsher Rex oqarpoq.
- Inuiaqatigiittut akissussaafferujussuarmik tigusisarpugut meeqqat angerlarsimaffiini peersillugit angajoqqaarsiaqartileraangatsigit, puigussanngilarpulli, meeqqat angajoqqaarsianut inissinneqaraangata akisussaaffik tassunga killeqanngimmat. Meeqqat angerlarsimaffiinit avataanut inissiineq meeqqamut ilaqutariillu inuunerannut annertuumik sunniuteqartarpoq, inuiaqatigiittullu pisussaaffigaarput, angerlarsimaffinnit peersitsiinnarneq anguniagassaanngitsoq. Suleriaqqinnissaq pingaaruteqarluinnarpoq taamaattumik iliuusissatut pilersaaruteqartariaqarpoq, meeqqap inissinneqarnerata nalaanni malillugit pisariaqarpallu iluarsartuullugit kikkut tamat ilaginnagaasutut misigisimannginniassammata.
Astrid Fleischer Rex'ip siunnersuutini saqqummiuppaa meeqqat angerlarsimaffiit avataanut inissinneqarsimasut taakkualu angajoqqaarsiaat pitsaanerusumik atugassaqarnissaat anguniarlugu.