Katsorsaavik oqqassutigaat

Inersimasut kinguaassiutitigut kanngutsaatsuliorfigineqarsimasut katsorsaavissaannik pilersitsinissaq pillugu assortuunneq ingerlavoq, katsorsaavissaq taanna naalakkersuisut 2009-mi suliassanngortitaat.

Ukioq taanna aappassaanerinermi ilaqutariinnermut naalakkersuisoq Mimi Karlsen neriorsuuteqarpoq, kingusinnerpaamik juunip aallaqqaataa 2010 ataatsimiititaliaq ilisimatinneqassasoq, inersimasunut katsorsaavissaq qanoq aallartinniarneqarnersoq, taassuma iluani qanoq qulakkeerneqassanersoq Nuup avataani najugallit katsorsartittarnissaat aamma anguniarlugu. Suli ilaqutariinnermut ataatsimiititaliaq taama paasitinneqarsimanngilaq.

Tamanna Siumup aamma Atassutip Ilaqutariinnermut ataatsimiititaliami ilaasortaasa naammaginngilluinnarpaat. Illuatungiliuttut ataatsimiititaliami ilaasortaat tassaapput Knud Kristiansen, Atassut, Ruth Heilmann, Siumut aamma Kristian Jeremiassen fra Siumut.

Ippassaq ataatsimiinnermi aporaativissortoqarpoq. Illuatungiliuttut isumaqarput ataatsimiititaliaq Mimi Karlsenip suliassaminik aallussisimannginnera pissutigalugu naammagittaalliussasut, suliassiissutigineqartumik naammassinnissimanngimmat naak taamaaliornissi neriorsuutigisimagaluarlugu.

Taamaattoq ataatsimiititaliap siulittaasua Olga Poulsen Berthelsen, Inuit Ataqatigiit, naalakkersuisooqatigiillu partiianni ilaasortat amerlanerussuteqarnertik atornerlunniarpaat, ilaqutariinnermut naalakkersuisup Inatsisartut suliakkiissutaat, tassa inersimasut siornatigut kinguaassiutitigut kanngutsaatsuliorfiusimasut nuna tamakkerlugu katsorsaavissaannik pilersitsinissaq.

Naalakkersuisuutitaqartut siulittaasup saniatigut Ilaqutariinnermut ataatsimiititaliami ilaasortaatitai tassaapput Debora Kleist (IA), Isak Hammond (IA), Astrid Fleischer Rex, Demokraatit.

Siumup Atassutillu ilaasortaatitaasa isornartorsiorpaat Olga P. Berthelsen, ataatsimiititaliaq suli ataatsimiinngitsoq tusagassiivinnut nalunaaruteqarsimanerarlugu ataatsimiititaliap isumaqatigiittup aalajangigarisimasaa pillugu. Tusagassiivinnut nalunaarummi naalakkersuisut uparuarneqarnissaat ataatsimiititaliamit pinaveersinneqarpoq suliamillu ingerlatsisimannginneq tunngavilersorneqarniarani.

Atassut aamma Siumup ataatsimiititaliami ilaasortaatitaasa kikkunnut tamanut tusagassiaraa, ataatsimiititaliami matoqqasumik ataatsimiinnermi susoqarsimanersoq, taamaaliortoqaqqusaanngilaq, oqarlutillu Inuit Ataqatigiit aamma Demokraatit maanna akuersaaginnaraat ilaqutariinnermut naalakkersuisup ataatsimiititaliamut neriorsuumminik naammassinnissinnaanngitsoq, suullu tamaasa atorlugit naalakkersuisooqatigiit Mimi Karlsenimik annaassiniarnerarlugit.

- Siumut aamma Atassutip ilaqutariinnermut ataatsimiititaliami ilaasortaasut akuersaanngilluinnarpaat, tusagassiivinnut allakkami ippassaq ataatsimiinnerup kingunitsianngua nassiunneqartumi allapput.

- Ilisimatitsissutigisigu ilaasortaasuusugut ataatsimiinnerup naammassilernerani aatsaat tusagassiorfitsigut nalunaaruteqartoqarniartoq paasitinneqarpugut. Naalakkersuisooqatigiikkormiut isumaqatigiissutigereersimallugu aammalu suliarereersimallugu tusagassiuutitigut nalunaarut saqqummiuppaat, Siumumit Atassummillu ilaasortaatitat pingasut nalunaarput, aperalutik:

- Naak tamat oqartussaaqataanerat, naak ataatsimiititaliap ataatsimoorluni sulinera aamma naak inatsisartut naalakkersuisullu sulinerat immikkoortoq.

Tusagassiivinnut nalunaarut atsiorneqarpoq Atassutip ilaasortaatitaa Knud Kristiansen, Siumup ilaasortaatitaa Ruth Heilmann og Siumup ilaasortaatitaa Kristian Jeremiassen.

Siornatigut Mimi Karlsen illersorniarluni nalunaaruteqarpoq, nuna tamakkerlugu katsorsaavissamik pilersitsinissaq aallartereersoq meeqqanik sullissineq siulliullugu tassa nuna tamakkerlugu meeqqat kinguaassiutitigut kanngutsaatsuliorfigineqarsimasut illussaannik pilersitsisoqarneranik.

Tamatuma saniatigut ukiaanerani ataatsimiinnermi Juliane Henningsen (IA)siunnersuummik saqqummiussivoq, naalakkersuisut inersimasut kinguaassiutitigut kanngutsaatsuliorfigineqarsimasut katsorsartinnissaannut pilersaarummik suliaqarnissaannik peqquneqassasut. Siunnersuut taanna naalakkersuisunit taperserneqarpoq, siunnersuutikkut inuiaqatigiini ajornartorsiut angisooq isiginiarneqassammat kikkullu tamat taassuma qanoq iliuuseqarfigineqarnissaa pingaartittariaqarmassuk. Taanna illuatungeriit tamarmiullutik isumaqatigigunarpaat.

Naak naalakkersuisut maanna pitsaasunik siunertaqarpasikkaluartut taamaattoq puiguinnarneqarsinnaanngilaq Inatsisartuni ukiut marluk matuma siorna aalajangiussaq naammassineqarsimanngimmat.

Naalakkersuisut nassuigassaqalerput, taamalu ilaqutariinnermut ataatsimiititaliaq isumaqatigiittoq uparuaasinnaasariaqarpoq, 2009-mi ukiakkut ataatsimiinnermi neriorsuumminnik sooq naammassinnissimannginnersut.

Tusagassiivinnut nalunaarut Olga P. Berthelsenip Ilaqutariinnermut ataatsimiititaliap tallimanngornermi ataatsimiinnermini atuarsimagunagaa, tusagassiivinnut nassiunneqarsimagunanngilaq.