Rubinit safirerillu

Inatsisartunut ilaasortap Finn Karlsenip naalakkersuisunut maanna apeqqutaa immaqa paasiuminaassinnaavoq.

Siullermik tusagassiivinnut nalunaarut True North Gems issaq nassiussaa innersuussutigaa, tassani suliffeqarfissuaq ilisimatitsivoq, Bent Olsvig Jensen kalaallit tunisassiorfiutaanni True North Gems Greenland A/S, pisortatut ivertinneqartoq. Tusagassiivinnut nalunaarummi tassani suliffeqarfissuaq nalunaarpoq Ward Kondas kalaallit tunisassiorfiutaanni pisortanut akuusussatut toqqarneqarsimasoq.

Susoqalernersoq paasigusuppara ulaaq radio avis-ikut tusarliunneqarpoq True North Gems canadameersoq ayorfinititsisimasoq, aligunik aappaluttunik aamma ujaqqanik erlinnartunik aappaluttunik tunisassiulernissamik siuttussamik.

Isumaqarluinnaqqissaarama nuna allamiunut tunniutiinassallugu kukkunerujussuusasoq ajornanngitsumik piiarneqarsinnaasoq aatinngikkaluarlugu pinnersaasiaralugu nunaqqatitta sapinngilluinnarmassuk.

APEQQUT:

1 Susoqalersoruna ilumut aligunik (rubin)-inik tunisassiulernissaq siunertaralugu piiaasoqalerpa

Canadamiunit?

2 Naalakkersuisunit eqqarsaatigineqarsimanngilaat nunaqavissunut inuusutissarsiutinngorlugu

Inatsisiliuullu aningaasarsiutinngortinnissaa? (aqunneqartumik)

Finn Karlsen paragraf 37'ikkut apeqquteqaatimini allappoq,:

- Isumaqarluinnaqqissaarama nuna allamiunut tunniutiinassallugu kukkunerujussuusasoq ajornanngitsumik piiarneqarsinnaasoq aatinngikkaluarlugu pinnersaasiaralugu nunaqqatitta sapinngilluinnarmassuk.

Taama naliliineq eqqarsarnarpoq tassami Siumut tassaammat True North Gemsip akuersissutaanik tunisisuunikuusoq. Tamatuma saniatigut Finn Karlsen, naalakkersuisut siuliini aatsitassanut akisussaaffimmik tigummisuni ilaasortaanikuusutut ilisimasariaqaraluarpaa, canadamiut ingerlatseqatigiiffiata akuersissutaa sunik imaqarnersoq.

Ingerlatsivik Qeqertarsuatsiaat eqqaani akuersissutinik marlunnik peqarput, nuna 110 kvadratkilometeriusoq aamma Qaqqatsiap eqqaani nuna 334 kvadratkilometeriusoq. Akuersissutit 2008-miit 2012-imut atuupput tassani nunap sananeqaataanik, aningaasaqarnikkut, avatangiisinik aamma inooqatigiinnermut misissuinissanik piginnaatitsisoq. Maanna piffissarititaasoq naangajalerpoq ingerlatsiviullu ujaqqanik pinnersaatissiassanik piianissi piareersalerpaa. True North Gemsip avatangiisit pillugit aamma inooqatigiinnermut misissuinini naammassilerpai, taakkua atorlugit piiaanermi avatangiisip najugaqarfiup aamma innuttaasut sunnerneqarsinnaaneri qanoq issanersut naatsorsorneqarput. Misissuinerup inernera piiaasinnaanermik akuersissummik pisinnaanermut tunngaviussaaq, taanna tunniunneqassasoq 2012'p ingerlanerani naatsorsuutigineqarpoq

Apeqqutit Finn Karlsenip akineqallaqusai ilaatigut canadamiut rubininik tunisassiornissaannut tunngassuteqarput. Ilanngullugu apeqqutigineqarpoq naalakkersuisut siunertarineraat nunatsinni innuttaasut tunisassiornermik ingerlatsissanersut taamalu nammineq aningaasarsiutigissaneraat.

Maannakkut naalakkersuisuusunut ajornakusuussaaq akuersissut Siumut qangaammalli tunniuteriigaa allanngortissallugu, akuersissutip taassuma iluaniimmat, misissuinerit tusarniaanerillu pisariaqartinneqartut pereerpata piiaasinnaanermut akuersissut.

True North Gems nammineq pilluni allappoq, ingerlatseqatigiiffiup Kalaallit Nunaanni Amerikallu avannaani ujaqqat erlinnartut qalipaatillit misissorneqarnissaat piiarneqarnissaallu soqutigisarigai. Ingerlatseqatigiiffik ujaqqanik erlinnartunik qalipaatilinnik misissuinermi siuarsimanerpaajuvoq, maannamullu Aappaluttoq Rubin aamma pink safir kisermaassilluni Kalaallit Nunaanni misissuiffigisinnaatitaagaa. True Northip anguniagaasa pingaarnerpaartaraat Kalaallit Nunaanni suliniut Aappaluttoq Rubin tunisassiassatut piiarnissaa.

Siumup ingerlatseqatigiiffiup Kalaallit Nunaanni suliniummi kisermaasisussaatitaasutut akuersissummik tunisimappagu, ajornakusuussaaq nunami innuttaasut rubininik safirinillu piiaasinnaanissaannut akuersissummik tuninissaat, True North Gemsip aningaasarpassuit atorlugit misissuiffigeriigaa.

True North Gems, Tsa da Glisza smaragdinik piiaavik Yukonimiittoq aamma Beluga Safir piiaavik, Baffin Island Nunavut'miittut kisermaasilluni piiaanissamik akuersissummik peqarfigai.