Ilulissat uuliasiorfinnik sullissinissaq sammivaat
Ineriartortitseqatigiiffimmik pilersitsineq suleriaqqinnissamut tulliuttumut pitsaasumik tunngaviliissaaq
Ilulissani imaani uuliasiorneq pillugu isumasioqatigiisitsinermi nalunaarusiaq Borgmester Jess Svane (S) ippassaq tallimanngornermi saqqummiunneqarpoq.
Ineriartortitseqatigiiffimmik pilersitsineq suleriaqqinnissamut tulliuttumut pitsaasumik tunngaviliissaaq, Qaasuitsup Kommunia tusagassiivinnut nalunaaruteqarpoq.
Suliffeqarfissuit sanaartukkatik nunami sumut inississinnaaneraat pillugu erseqqissumik nalunaarusiami siunnersuuteqarpoq. Tamatuma saniatigut nalunaarusiami ineriartortitseqatigiiffimmik pilersitsisoqarneratigut ineriartorneq aallarsartinneqarsinnaasoq siunnersuutigineqarpoq.
Borgmester Jess Svane (S) oqarluttuarpoq kommunimi aningaasaqarnermut ataatsimiititaliaq aalajangereersimasoq siunnersuutit taakku marluk suliarineqalissasut.
”Suliffeqarfissuit pisariaqartitaat matussusernissaannut piareersimarusuppugut. Taamaattumik siunnersuutit pillugit Inuussutissarsiornermut Aatsitassarsiornermullu Naalakkersuisoq oqaloqatigereerparput suliassallu aallartereerlugit, ” taama Jess Svane oqaluttuarpoq.
Aasiaat Upernavillu toqqarneqartut
Misissueqqissaarneq Qaasuitsup Kommunianit siunnersueqatigiiffimmillu COWI-mit suliarineqarpoq.
Avannaata imartaani ingerlanneqartunut ”Offshore Onshore”-mi ersarilluinnartumik Aasiaat Upernavillu pingaarnertut pilersuiviusussatut toqqarneqarput.
Kommunimi illoqarfiit nunaqarfiillu arlallit imaani uuliasiornermut suliffeqarfissuarnut saniatigut pilersuivittut atorneqarsinnaasut paasineqarsimavoq.
Kommunimi aningaasaqarnermut ataatsimiititaliaq pilersaarusiorluni suliassat, ukiortaamiit nunaminertat suliffeqarfissuarmut naleqqussakkat kommunimit tunniunneqarsinnaalersitsisussat, pisariaqartut aallartereersimavaat.
Ineriartortitseqatigiiffik ersarissunik anguniagalik
Nalunaarusiami ”Offshore Onshore”-mi siunnersuutigineqarportaaq kommuni nutaamik isumaliorsinnaasariaqartoq. Nalunaarusiami siunnersuutigineqarpoq kommunip ineriartortitseqatigiiffimmik, pilersitsinissaminut periarfissani misissussagai.
Ineriartortitseqatigiiffik taamaattoq inuussutissarsiornermik ineriartortitsinissamut periarfissiissaaq, tamatumalu saniatigut kommuni kisimiilluni aningaasaliissanngilaq.
Qaasuitsup Kommunia massakkut ineriartortitseqatigiiffimmik pilersitsinissaq pillugu Namminersorlutik Oqartussanik oqaloqateqarpoq.
- Tassami piginneqatissanik ujarlertoqalinnginnerani suliffeqarfimmillu pilersitsisoqannginnerani sinaakkutit qulaajaqqaarnissaat pingaaruteqarami.