Ilisimatusarfik Naalakkersuisunik isumaqatigiinniassaaq
Ilisimatusarfik ineriartortitsinermik isumaqatigiissutissamik isumaqatigiissummik pisinnaaguni meeqqat atuarfiata ineriartorteqqinneranik ingerlatseqqinniarpoq - aamma nutserisutut ilinniarneq pitsanngorsarusullugu
Ilisimatusarfimmi siulersuisut 12. oktober 2011-imi ataatsimiinnerminni aalajangerpaat, ineriartortitsinermik isumaqatigiissutissamik Naalakkersuisut isumaqatigiinniarfigineqassasut. Tamanna tusagassiivinnut nalunaarummi erseqqissarneqarpoq.
Ilisimatusarfik pillugu inatsimmi 2007-imeersumi Ilisimatusarfiup Naalakkersuisullu angusaqarnissaq pillugu isumaqatigiissuteqarsinnaanerat periarfissaavoq. Ineriartortitsinissamik imaluunniit angusaqarnissamik isumaqatigiissummi siunertarineqarpoq, Ilisimatusarfiup suliassaasa suliniutissaasalu suunerinik taakkualu aningaasalersorneqarnissaannik ersarissumik isumaqatigiissuteqarsinnaaneq.
Ineriartortitsinermik isumaqatigiissut, Ilisimatusarfiup Iliuusissaasa akuerisaasut saniatigut, ilinniartitaaneq, ilisimatusarneq paasissutissiisarnerlu pillugit annertunerusumik suliniutissanik imaqartussaavoq.
IIN (Ilinniartitaanermut Ilisimatusarnermullu Naalakkersuisoqarfik) suleqatigalugu meeqqat atuarfiat pillugu suliniutissat pingaartillugit ilaatinneqassapput.
Ilinniartitsisunik ilinniartitsisarneq, ilinniartitsisunik ilinniartitseqqittarneq suliallu allat ilisimatusarnermik tunngaveqartut Ilinniarnermik Ilisimatusarfiup, Ilinniarfissuarmik Inerisaavimillu ilaqartup, ingerlappai taamaammallu Ilisimatusarfik meeqqat atuarfiannut ingerlalluartumut sulliviuvoq pingaaaruteqartoq.
IIN-imit aamma pingaartinneqarpoq, ineriartortitsinermut isumaqatigiissut peqqinnissaqarnermi, inunnik isumaginninnermi siunnersuinermi, tusagassiuuteqarnermi, ilinniartitsisunngorniarnermi il.il. ilinniartitaanerit kattunnerisigut angusat annertusinerisa takussutissaanik imaqartinneqassasoq.
Ineriartortitsinermik isumaqatigiissutip tamanit piginnittuunermik misigisimaneqarnissaa qularnaarumallugu siulersuisut pingaartippaat ilinniartut Ilisimatusarfiullu sulisui allat isumaqatigiissutissap piareersarnerani peqataatinneqarnissaat. Ineriartortitsinermik isumaqatigiissutissaq 2012-ip upernaavani, siulersuisut nutaat atuutilereerpata, Ilinniarnermut Ilisimatusarnermullu Naalakkersuisorlu atsiorneqarumaartoq naatsorsuutigineqarpoq.
Siulersuisut aamma nutserinermi ilisimatusarnermi bacheloritut ilinniartitaanerup pilersinnissaa aalajangiuppaat.
Aningaasalersorneqarnissaa inissinneqareerpat Ilisimatusarfiup 2012-ip ukiaani kalaallisut, qallunaatut tuluttullu inuussutissarsiuteqarfiusumik nutserinermi ilinniarneq aallartissinnaassavaa.