Kalaallit Nunaanni eqqagassalerineq pillugu filmi
Filmimi angerlarsimaffinni eqqagassat aamma eqqagassat ulorianartut isiginiarneqarput, tassani takuneqarsinnaavoq inuit qanoq iliuuseqalaarninngui eqqagassalerinermik allanngortitsisinnaanerat taamalu pinngortitamik illersueqataalerneq
Eqqagassat annertuut qanoq iliuuseqarfiginissaat ilaatigut nalunartarpoq (ilaatigut eqqagassat ulorianarsinnaasut) sulili ajornarnerulertarpoq inuit inuiaqatigiinni anginngitsuni najugallit ikuallaavilinnut ungasissorujussuarmi najugaqartillugit.
Kalaallit Nunaanni eqqagassalerineq pillugu filmiliaq nutaaq tamakkuninnga sammisalik ateqarpoq: "Mission Grønland for en renere fremtid", Det Europæiske Miljøagenturs (EEA)'s nittartagaani UANI takusinnaavat..
Filmimi sammineqartut kalaallisut, danskisut tuluttullu oqaasertaqartut tassaapput Avatangiiseq peqqinnissarlu, Eqqagassat atortussallu aammalu sumiiffiit immikkuullarissut.
Filmi naatsoq danskisoortoq uani nittartakkami takusinnaasat Det Europæiske Miljøagenturimit suliarineqarpoq. Aamma kalaallisut tuluttullu isiginnaarsinnaavat.
Filmimi sammineqartoq tassaavoq angerlarsimaffinniit eqqagassat ilaagigullu eqqagassat ulorianartut, takutinniarneqarluni inuit annikikkaluamilluunniit iliuuseqarnerisigut eqqagassalerinerup allanngortinneratigut annertuumik sunniisinnaanerat minnerunngitsumik avatangiisimut illersuineq eqqarsaatigalugu.
Kalaallit Nunaanni angerlarsimaffiit eqqagassartaasa 25 procentiat atoqqitassatut ingerlateqqinneqartarpoq, taamaattumik Det Europæiske Miljøagenturimit neriuutigineqarpoq filmip nutaap innuttaasut pingaartumik meeqqat inuusuttullu Kalaallit Nunaanni Issittumilumi tamarmi isumassarsitissagaat eqqakkat pitsaanermik suliarineqartalernissaannut. Filmi ilinniartitsinermi atugassanik tapertaqarpoq.
Filmi 12 minutsinik takissusilik qanittumi Nunami namminermi pissutsinut naalakkersuiumit Anthon Frederiksenimit aamma Jacqueline McGlade, Det Europæiske Miljøagenturimeersumit saqqummiunneqarpoq. Takutitseqqaarneq Nuummi ingerlanneqarpoq
Eqqagassalerinermi unammisassat
Eqqagassalerineq soorlu nunani avinngarusimasuni Issittumiittuni aningaasarpassuarnik naleqarpoq. Eqqagassalereriaatsit nutaaliaasut ilaatigut Europami Amerikallu avannaani atorneqartut imaasiallaannarlugit nunatsinni atorneqarsinnaanngillat. Kalaallit Nunaat peqqarniitsumik atugassaqartitsisoq aammalu inui siammasissut immikkut ittumik eqqagassanut tunngatillugu suleriaaseqartariaqarput pissutsinut naleqquttumik.
Avinngarussimaneq aammalu akissat pissutigalugit Kalaallit Nunaanni nunaqarfinni illoqarfinnilu eqqagassat eqqaavinnut ammaannartunut eqqarneqartarput. Eqqagassat immikkoortiterneqarneq ajorput ilaatigut tassaapput batteriit, qalipaatikut, kukinut tarngutit akuutissallu allat immikkoortiterneqqarneq ajorput.
Eqqakkat tamakku ulorianaatillit nunaqavissut peqqissusaannut sunniuteqarsinnaapput, ikuallanneqarnerminni pujuliaat, imaluunniit nunamut kuuttut kiisalu eqqaavinniit imeq ilaatigut kuuinnartarpoq sinaasigut illersuutitaqarneq ajormat. Akuutissat imaanut kuutiinnarneqartarput naak innuttaasut aalisakkanik, raajanik imarmiunillu ulluinnarni nerisaqarluaraluartut.
Taamaattoq Kalaallit Nunaanni eqqagassalerineq aamma nuannersortaqarpoq. Assersuutigalugu puiaasaaqqat plastikkit aamma igalaamerngit 99 procentii utertinneqartarput, tamanna nunarsuup sinnerani ilinniutigineqarsinnaalluarpoq, Det Europæiske Miljøagentur nittartakkamini allappoq.
Filmi sammisaa piviusorsiorpoq aammali siunnersuutinik toqqaannartunik saqqummiussilluni. Taakkua atorlugit Kalaallit Nunaanni innuttaasut avatangiisiminnik aseruinngikkaluarlutik eqqagassanik qanoq iliuuseqarsinnaanerannut siunnersuutitaqarpoq. Kalaallit Nunaata ilisimaneqaatigaa pinngortitarsuaq tupinnaannartoq eqqaamassavarpulli avatangiiseq aserujammat, taamaattumillu eqqagassat pitsaasumik suliarineqartarnissaat pingaaruteqarluinnarmat, filmip saqqummiunneqarneranut atatillugu Det Europæiske Miljøagentur naqissusiivoq.