Takanna
Nanortalimmi meeqqat inuusuttullu peqqinnartunik nerissapput. Inuussutissat nunatsinneersut allaanerusumik sassaalliutigineqarmata kulturip illua inunnik ulikkaarpoq
Nanortalimmi paaqqinnittarfinni iggavinni pisortat igasumit nunarsuaq tamaat tusaamasaasumit Jamie Oliver'imit ilikkagaqarsimapput. Taanna Tuluit nunaat, USA aamma Australiami meeqqat atuarfiini igaffinni sulisut, meeqqat nerisassaat peqqinnartut kajuminnartunngortinnissaannik suliniuteqarnini ilaatigut tusaamasaassutigaa.
Sapaat oktobarip 9-at illoqarfimmi igaffinni pisortat aalisartut piniartullu suleqatigalugit Nanortalimmi Kulturip Illua peqatigalugu kikkunnut tamanut ammasumik aaqqissuussipput. Aaqqissuussinermi anguniarneqarpoq inuussutissat nunatsinneersut allatut piareersaraanni meeqqanut inuusuttunulli kajuminnartunngortinneqarsinnaasut.
Kommune Kujallermi Inuussutissarsiornermut suliffeqarnermullu immikkoortortaqarfik tusagassiivinnut nalunaarpoq aaqqissuussineq ornigarneqarluarsimasoq.
Nunatsinnit inuussutissat pitsassuit soorlu aalisakkat, puisi, arferit, uillut, sulluitsut aammalu kuannit atorlugit inuppassuit periarfissinneqarput nerisassianik ussiinissaminnut soorlu Arfeq Chop suey, saarullik lasagne, tartelettit uilullit, puisi pizza, bollut kuannillit aammalu suppi aalisakkanit sanaaq.
Aaqqissuussineq ingerlanneqarpoq nunatsinni inuussutissanik atuinerulernissaq anguniarlugu suliniummut akuutillugu, Kommune Kujalleq upernaakkut 2011 Inuussutissarsiornermut pisortaqarfimmit Nunap immikkoortuata ilaannut ineriartortitsinissamut aningaasaliissutit ilaat atorlugit.
Ukioq aallartimmat igaffinni pisortat arlallit ulluni 14-ini Inuilimi pikkorissartinneqarput, paaqqinnittarfinni inuussutissat nunatsinneersut atorneqarnerulernissaat anguniarlugu, pikkorissarnermit tassannga ilikkakkat paasisallu Nanortalimmi innuttaasunut ingerlateqqikkusunneqarlutik.
Aaqqissuussinissamut suliniuteqartut 6.000 koruuninik atugassinneqarput, aaqqissuussisullu ilimagaat Nanortalimmiut 300 miss. peqataasimasut, tamanna tusagassiivinnut nalunaarummi ersermat.
Kommune Kujallermi Inuussutissarsiornermut suliffeqarnermullu ataatsimiititaliap siulittaasua Kalistat Lund oqarpoq, suliniut kusartorujussuusoq.
- Aaqqissuussineq illoqarfimmiunit taama ornigarneqarluartigisoq takullugu nuannaajallannarpoq. Kommune Kujallermi inuussutissat isiginiarneqaqaat pisortallu aqutaanni inuussutissat nunatsinneersut atorluarneqarnerunissaat sulissutigaarput, inuinnaat aamma angorusuppagut taamaammat aaqqissuussinerit taamaattut pingaaruteqaqaat, taanna oqarpoq.
Kommune Kujallermi Inuussutissarsiornermut suliffeqarnermullu siulittaasup nuannaarutigaa pisortat ingerlataat taamaattut sammisaqartitsinissanut allanut aaqqissuussiniarlutik aningaasanik qinnuteqalereersut, tamakku aqqutigalugit inuussutissanik nunatsinneersunik atuinerulernissarput anguniarneqassammat, Kommune Kujallermi Inuussutissarsiornermut suliffeqarnermullu ataatsimiititaq nalunaarpoq.